ପଟ୍ଟାମୁଣ୍ଡାଇ ତା ୨/୬- ଶିଶୁ ମାନଙ୍କ ମାନସିକ ଓ ବୌଦ୍ଧିକ ବିକାଶ ଉପରେ ରାଜ୍ୟ ସରକାର ଗୁରୁତ୍ୱାରୋପ କରୁଥିବାବେଳେ ପଟ୍ଟାମୁଣ୍ଡାଇର କେନ୍ଦ୍ର ସ୍ଥଳରେ ଥିବା ଶିଶୁ ଉଦ୍ୟାନଟି ରକ୍ଷଣାବେକ୍ଷଣ ଅଭାବରୁ ଶ୍ରୀହୀନ ହୋଇପଡିବା ସହିତ ଘଞ୍ଚ ଜଙ୍ଗଲରେ ପରିଣତ ହୋଇଛି । ଯାହାଫଳରେ ଏହି ଉଦ୍ୟାନ ମଧ୍ୟକୁ ଯିବାକୁ ଶିଶୁ ମହିଳା ସମେତ ଲୋକମାନେ ଭୟ କରୁଛନ୍ତି ।
ପ୍ରକାଶ ଯେ ଗତ ୨୦୧୬ ମସିହାରେ ତତ୍କାଳୀନ ସରକାର ସମୟରେ ପ୍ରାୟ ୧୦ ଲକ୍ଷ ଟଙ୍କା ବ୍ୟୟରେ ପଟ୍ଟାମୁଣ୍ଡାଇ ପୌର ପରିଷଦ ପକ୍ଷରୁ ପଟ୍ଟାମୁଣ୍ଡାଇ ବ୍ଲକର କଲୋନୀ ମଧ୍ୟରେ କରାଯାଇଥିଲା । ଶିଶୁ ମାନଙ୍କ ଶାରୀରିକ ମାନସିକ ଓ ବୌଦ୍ଧିକ ବିକାଶ ଲକ୍ଷ୍ୟରେ ଏହି ଉଦ୍ୟାନ କରାଯାଇଥିଲା । ଏହି ଉଦ୍ୟାନ ମଧ୍ୟରେ ଶିଶୁ ମାନଙ୍କୁ ଆକର୍ଷଣୀୟ କରିବା ପାଇଁ ନକଲି ଜିରାଫ, ଓଟ ହାତୀ ଆଦି ବିଭିନ୍ନ ପଶୁ ମାନଙ୍କ ମୂର୍ତ୍ତି ସ୍ଥାପନ ସହ ୱାଟର ସ୍ପ୍ରେ, ଉଜ୍ୱଳ ଆଲୋକ ବ୍ୟବସ୍ଥା, ବିଭିନ୍ନ ବ୍ୟାୟାମ ସରଞ୍ଜାମ ଖଞ୍ଜା ଯାଇଥିଲା । ଆବଶ୍ୟକ ରକ୍ଷଣାବେକ୍ଷଣ ଅଭାବରୁ ସମସ୍ତ ମୂର୍ତ୍ତି, ବ୍ୟାୟାମ ସାରଞ୍ଜାମ ଆଦି ଭାଙ୍ଗି ରୁଜି ଗଲାଣି । ଉଦ୍ୟାନ ମଧ୍ୟରେ ଥିବା ଘାସ ଗୁଡିକ କଟା ନଯିବାରୁ ଘାସ ଗଛ ବଡ଼ ହୋଇ ଜଙ୍ଗଲ ତିଆରି ହେଲାଣି । ଏଥି ସହିତ ଅନାବନା ଘାସ ସହ ବିଭିନ୍ନ ଅଦରକାରୀ ଗଛ ଗୁଡିକ ସୃଷ୍ଟି ହୋଇ ଜଙ୍ଗଲ ତିଆରି ହୋଇଥିଲେ ମଧ୍ୟ ପୌର କତୃପକ୍ଷଙ୍କ ଏଥି ପ୍ରତି ନିଘା ନାହିଁ । ଉଦ୍ୟାନ ମଧ୍ୟରେ ଥିବା ସିମେଣ୍ଟ ଚେୟାର ଭାଙ୍ଗିରୁଜି ଗଲାଣି । ବର୍ଷା ପବନ ଯୋଗୁଁ ଉଦ୍ୟାନ ମଧ୍ୟରେ ବଡ଼ ବଡ଼ ଗଛ ଉପୁଡି ପଡି ରହିଛି ।ଉଦ୍ୟାନ ଚାରି ପଟେ ଥିବା ଲୁହା ଗ୍ରିଲ ଗୁଡିକ ମଧ୍ୟ ଭାଙ୍ଗି ଗଲାଣି । ଏହି ଶିଶୁ ଉଦ୍ୟାନକୁ ଆକର୍ଷଣୀୟ ଓ ମନୋରମ କରିବା ପାଇଁ ଲାଗି ଥିବା ବିଭିନ୍ନ ପ୍ରକାର ଫୁଲ ଫଳ ଗଛ ଗୁଡିକ ମରିବାକୁ ବସିଲାଣି । ପଟ୍ଟାମୁଣ୍ଡାଇ ସହରର ପ୍ରାଣ କେନ୍ଦ୍ର ପଟ୍ଟାମୁଣ୍ଡାଇ ବ୍ଲକ କଲୋନୀ ମଧ୍ୟରେ ଶିଶୁ ଉଦ୍ୟାନ କରାଯାଇଥିବାରୁ ଏହା ସମସ୍ତଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟି ଥିଲା । ପ୍ରତ୍ୟହ ଅପରାହ୍ନରୁ ସନ୍ଧ୍ୟା ପର୍ଯ୍ୟନ୍ତ ଏଠାରେ ପିଲାମାନଙ୍କ ଭିଡ଼ ଜମି ଥାଏ । ଦୀର୍ଘ ଦିନ ଧରି ଆବଶ୍ୟକ ରକ୍ଷଣାବେକ୍ଷଣ ଅଭାବରୁ ଶିଶୁ ଉଦ୍ୟାନଟି ଶ୍ରୀହୀନ ହୋଇ ପଡିଥିବାରୁ ପୂର୍ବ ଆକର୍ଷଣ ହରାଇ ବସିଛି । ସନ୍ଧ୍ୟା ସମୟରେ ଉଦ୍ୟାନରେ ନାମକୁ ମାତ୍ର କେତୋଟି ପିଲା ବୁଲାବୁଲି କରିବା ଦେଖାଯାଉଛି । ଶିଶୁ ଉଦ୍ୟାନଟି ଶ୍ରୀହୀନ ହୋଇପଡିଥିବାରୁ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି । ରାଜ୍ୟ ସରକାର ଓ ପୌର ପରିଷଦ କତୃପକ୍ଷ ତୁରନ୍ତ ଦୃଷ୍ଟି ଦେଇ ଏହି ଶିଶୁ ଉଦ୍ୟାନର ପୂର୍ବ ଅବସ୍ଥା ଫେରାଇ ଆଣିବାକୁ ଦାବୀ ହେଉଛି ।