କେନ୍ଦ୍ରାପଡ଼ା,୧୧ା୧୧: କେନ୍ଦ୍ରାପଡା ଟାଉନ ଥାନା ଅଞ୍ଚଳର ଜଣେ ମହିଳାଙ୍କୁ ବିବାହ ପ୍ରତିଶ୍ରୁତି ଦେଇ ବ୍ୟକ୍ତି ଜଣଙ୍କ ଶାରୀରିକ ସମ୍ପର୍କ ରଖିବା ସହିତ ଜାଗା କିଣାଇ ଦେବା ବାହାନାରେ ୧୪ ଳକ୍ଷ ଟଙ୍କା ନେଇଥିଲେ । ପୁଅ ବାହାଘର ସରିବା ପରେ ମହିଳାଙ୍କୁ ବିବାହ କରିବେ ବୋଲି ପ୍ରତିଶ୍ରୁତି ଦେଲେ। ହେଲେ ମହିଳାଙ୍କୁ ବିବାହ କଲେ ନାହିଁ କି ତାଙ୍କ ଟଙ୍କା ଫେରାଉ ନାହାଁନ୍ତି। ଓଲଟା ମହିଳାଙ୍କୁ ଜୀବନରୁ ମାରିଦେବେ ବୋଲି ଧମକ ଦେଉଛନ୍ତି। ଏ ନେଇ ମହିଳା ଜଣକ ଟାଉନ୍ ଥାନାର ଦ୍ୱାରସ୍ଥ ହୋଇ ଅଭିଯୋଗ କରିଛନ୍ତି । ପୀଡିତାଙ୍କ ଅଭିଯୋଗ ପରେ ଟାଉନ ଥାନା ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ମହିଳାଙ୍କ ଅଭିଯୋଗ ମୁତାବକ, ସ୍ଥାନୀୟ ଅଂଚଳର ଜଣେ ବ୍ୟକ୍ତି ତାଙ୍କୁ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ। ପରେ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ମହିଳା ଜଣକ ସହରରେ ଏକ ଜମି କିଣିବେ ବୋଲି ତାଙ୍କୁା କହିିଥିଲେ। ଉକ୍ତ ବ୍ୟକ୍ତି ତାଙ୍କୁ ଜମି କିଣାଇ ଦେବେ ବୋଲି କହିଥିଲେ। ଏ ନେଇ ମହିଳା ଜଣକ ତାଙ୍କୁ ୧୪ ଲକ୍ଷ ଟଙ୍କା ଦେଇଥିଲେ। ବ୍ୟକ୍ତି ଜଣଙ୍କର ପୁଅ ବାହାଘର ପରେ ସେ ମହିଳାଙ୍କୁ ବିବାହ କରି ଘରକୁ ନେବେ ବୋଲି ପ୍ରତିଶ୍ରୁତି ଦେଇଥିଲେ। ମାତ୍ର ଦିନ ଗଡିବା ସହିତ ସେ ଆଉ ମହିଳାଙ୍କୁ ବିବାହ କରି ନଥିଲେ। ସେ ଏ ନେଇ ଜିଦି କରିବା ପରେ ତାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଦୁର୍ବଳ ମୁହୂର୍ତ୍ତର ଭିଡିଓକୁ ସାମାଜିକ ଗଣମାଧ୍ୟମରେ ଭାଇରାଲ କରିଦେବେ ଓ ଆବଶ୍ୟକ ପଡିଲେ ଜୀବନରୁ ମାରିଦେବେ ବୋଲି ଧମକ ଦେଉଥିଲେ ବୋଲି ମହିଳା ଜଣକ ତାଙ୍କ ଏତଲାରେ ଦର୍ଶାଇଛନ୍ତି। ଅଭିଯୋଗ ହେବା ପରେ ପୋଲିସ ଉକ୍ତ ବ୍ୟକ୍ତଙ୍କି ବିରୋଧରେ ୨୫୦/୨୦୨୫ରେ ଭାରତରୟ ନ୍ୟାୟ ସଂହିତାର ୬୯, ୩୫୧(୩) ଓ ୨୯୬ ଦଫାରେ ମାମଲା ରୁଜୁ କରି ତଦନ୍ତ ଚଳାଇଛି ବୋଲି ଥାନାଧିକାରୀ ଦିଲ୍ଲୀପ କୁମାର ସାହୁ ସୂଚନା ଦେଇଛନ୍ତି।