ପଟ୍ଟାମୁଣ୍ଡାଇ ୧୯/୮-କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଆଦର୍ଶ ଥାନା ଅଂଚଳରେ ମଙ୍ଗଳବାର ଏକ କୌତୁହଳପ୍ରଦ ଘଟଣା ଦେଖିବାକୁ ମିଳିଛି । ପ୍ରଥମ ପତ୍ନୀ ୪ଟି ପିଲା ଥାଇ ମଧ୍ୟ ଜଣେ ବ୍ୟକ୍ତି ଲୁଚିଛପି ଦ୍ୱିତୀୟ ବିବାହ କରୁଥିଲା । ଏହା ଜାଣି ପ୍ରଥମ ପତ୍ନୀ ସେଠାରେ ପହଁଚି ଉକ୍ତ ବିବାହ ବିରୋଧ କରିବା ସହ ପଟ୍ଟାମୁଣ୍ଡାଇ ଆଦର୍ଶ ଥାନାରେ ଅଭିଯୋଗ କରିଥିଲେ । ଥାନା ପୋଲିସ ଘଟଣା ସ୍ଥଳରେ ପଂହଁଚି ସ୍ୱାମୀ କିଶୋର ମଲିକ ଓ ତାଙ୍କ ବିବାହିତା ପ୍ରେମିକାଙ୍କୁ ଥାନାକୁ ଆଣି ଅଟକ ରଖି ପଚରାଉଚରା କରୁଛି।
ମିଳିଥିବା ସୂଚନା ମୁତାବକ, ପଟ୍ଟାମୁଣ୍ଡାଇ ଆଦର୍ଶ ଥାନା ଅନ୍ତର୍ଗତ ତନୁପୁର ଗ୍ରାମର କିଶୋର ମଲିକ ଗତ ୧୭ ବର୍ଷ ତଳେ ଗ୍ରାମାଂଚଳ ଥାନା ଅଧିନ ଆମ୍ବେର ଗ୍ରାମର ବନ୍ଦନା ମଲିକଙ୍କୁ ବୈଦିକ ରୀତିନୀତିରେ ବିବାହ କରିଥିଲେ। ଦମ୍ପତିଙ୍କର ୩ କନ୍ୟା ସନ୍ତାନ ଥିବା ବେଳେ ଗତ ୬ଦିନ ତଳେ ଆଉ ଏକ କନ୍ୟା ସନ୍ତାନ ଯାତ ହୋଇଛି । ଯାହାକୁ ନେଇ ଡାକ୍ତର ଖାନାରେ ଉଭୟଙ୍କ ମଧ୍ୟରେ ବିବାଦ ଦେଖାଯାଇଥିଲା । ଅପରପକ୍ଷେ କିଶୋର ଭୁବନେଶ୍ୱରରେ ଏକ କମ୍ପାନିରେ କାମ କରୁଥିବା ବେଳେ ଆଳି ଅଂଚଳର ଜଣେ ଯୁବକ ତାଙ୍କ ପରିବାର ସହିତ ପାଖ ପଡୋଶି ହୋଇ ରହୁଥିଲେ । କାଳକ୍ରମେ ଜନୈକା ପଡୋଶି ବିବାହିତା ମହିଳାଙ୍କ ସହିତ କିଶୋରର ପ୍ରେମ ସମ୍ପର୍କ ଗଢି ଉଠିଥିଲା । ଯାହାକୁ ନେଇ ବନ୍ଦନାଙ୍କ ସହ ସ୍ୱାମୀ କିଶୋରଙ୍କ ମଧ୍ୟରେ ସବୁଦିନ ଦିବାଦ ଲାଗିରହୁଥିଲା । ଗତ ୮ ଦିନ ପୂର୍ବରୁ ପ୍ରଥମ ସ୍ତ୍ରୀ ବନ୍ଦନା ଆଦର୍ଶ ଥାନାରେ ଅଭିଯୋଗ କରିଥିବା ବେଳେ ଏହାର ସମାଧାନ ହୋଇଥିଲା । ମାତ୍ର କିଶୋର ମଙ୍ଗଳବାର ସିଭିଲ୍ କୋର୍ଟ ନିକଟ ଏକ ସ୍ଥାନରେ ଉକ୍ତ ବିବାହିତା ମହିଳା ସହିତ ଦ୍ୱିତୀୟ ବିବାହ କରୁଥିଲେ । ଏହି ସମୟରେ ପ୍ରଥମ ସ୍ତ୍ରୀ ବନ୍ଦନା ଓ ତାଙ୍କ ପରିବାର ଲୋକେ ପହଁଞ୍ଚି ସେଠାରେ ହଙ୍ଗାମା କରିଥିଲେ । ତେବେ ଏହି ଘଟଣା ଉଗ୍ରରୂପ ନେବା ପରେ ମାମଲା ଥାନାରେ ପହଁଚି ଥିଲା । ତେବେ ପୋଲିସ ପ୍ରଥମ ସ୍ତ୍ରୀଙ୍କ ଅଭିଯୋଗକୁ ଆଧାର କରି ତଦନ୍ତ ଆରମ୍ଭ କରିଛି ।
ପ୍ରକାଶ ଥାଉକି ଜନୈକା ମହିଳା ପ୍ରେମିକା ଚାନ୍ଦୋଳ ଅଂଚଳର ହୋଇଥିବା ବେଳେ ଗତ ୨ ବର୍ଷ ତଳେ ଆଳି ଅଂଚଳରେ ପ୍ରେମ ବିବାହ କରିଥିଲେ । ସ୍ୱାମୀ ତାଙ୍କୁ ମାରଧର କରୁଥିବାରୁ ସେ କିଶୋରଙ୍କୁ ପ୍ରେମ କରିବସିଥିଲେ । ଗତ ୪ଦିନ ପୂର୍ବରୁ ସେ ତାଙ୍କ ସ୍ୱାମୀ ସହିତ ମତାନ୍ତର ନେଇ ଆଳି ଥାନାରେ ଅଭିଯୋଗ କରିଥିବା ସେ କହିଛନ୍ତି । ଯଦି କିଶୋରଙ୍କ ସହିତ ତାଙ୍କର ବିବାହ ନହୁଏ ତାହେଲେ ସେ ଅତ୍ମହତ୍ୟା କରିବେ ବୋଲି ଥାନାରେ ଚେତାବନୀ ଦେଉଥିବା ଜଣାପଡିଛି ।