ଅସରାଏ ବର୍ଷାରେ ଶ୍ରମ କାର୍ଯ୍ୟାଳୟ ପରିସରରେ ଆଣ୍ଠୁଏ କାଦୁଅ

କେନ୍ଦ୍ରାପଡ଼ା,୨୨ା୪: ଅସରାଏ ବର୍ଷାରେ କେନ୍ଦ୍ରାପଡ଼ା ଜିଲ୍ଲା ପ୍ରଭାଗୀୟ ଶ୍ରମ ସଂସ୍ଥାପକଙ୍କ କାର୍ଯ୍ୟାଳୟ ପରିସରରେ ଆଣ୍ଠୁଏ କାଦୁଅ ସୃଷ୍ଟି ହୋଇଛି। ଏହି ରାସ୍ତା ଦେଇ ଶ୍ରମିକ ଓ କର୍ମଚାରୀମାନେ ଯିବା ଆସିବାରେ ବିଭିନ୍ନ ସମସ୍ୟା ସୃଷ୍ଟି ହେଉଛି। ବର୍ଷା ହେଲେ ଏଭଳି ପରିସ୍ଥିତି ସୃଷ୍ଟି ହେଉଛି ବୋଲି କେତେକ ଶ୍ରମିକ ନେତା କହିଛନ୍ତି। ସେହିପରି ଏହା ପରିସରକୁ ବିଭିନ୍ନ କାର୍ଯ୍ୟରେ ଆସୁଥିବା ଶ୍ରମିକମାନେ ମଧ୍ୟ ହଇରାଣ ହରକତ ହେଉଥିବା ପ୍ରକାଶ କରିଛନ୍ତି। କେବଳ ଶ୍ରମିକ ନୁହଁନ୍ତି ଶ୍ରମ କାର୍ଯ୍ୟାଳୟର କର୍ମଚାରୀ ଓ ଅଧିକାରୀମାନେ ମଧ୍ୟ ହଇରାଣ ହରକତ ହେଉଥିବା ପ୍ରକାଶ କରିଛନ୍ତି। ଶ୍ରମିକ ନେତା ଫକୀର ଚରଣ ଖଟୁଆ କହିଛନ୍ତି ଦୀର୍ଘ ଦିନ ଧରି ଏହି ସମସ୍ୟା ଲାଗି ରହିଛି। ଶ୍ରମ କାର୍ଯ୍ୟାଳୟକୁ ଲାଗି ରହିଛି ଚକବନ୍ଦୀ କାର୍ଯ୍ୟାଳୟ। ତେଣୁ ପ୍ରତିଦିନ ଶତାଧିକ ଲୋକ ଓ କର୍ମଚାରୀ ଏହି ସ୍ଥାନକୁ ଯିବା ଆସିବା କରୁଛନ୍ତି। ଏହି ରାସ୍ତା ପୂର୍ବରୁ ଖାଲଖମା ଥିଲା। ବହୁ ଦାବି ପରେ ରାସ୍ତାର କିଛି ଅଂଶ ପେଭର ବ୍ଲକ ପଡିଛି। କିନ୍ତୁ ରାସ୍ତାର ଅବଶିଷ୍ଟ ଅଂଶ ମାଟି କାଦୁଅରେ ଭରପୁର ରହିଛି। ତେଣୁ ଅସମ୍ପୂର୍ଣ୍ଣ ରାସ୍ତାକୁ ସଂପୂର୍ଣ୍ଣ କରାଯାଉ। ଏଥିସହ ଶ୍ରମ କାର୍ଯ୍ୟାଳୟ ଓ ଚକବନ୍ଦୀ କାର୍ଯ୍ୟାଳୟ ପରିସରକୁ ପକ୍କା କରାଯାଉ। ଫଳରେ ସାଧାରଣ ଲୋକ, ଅଧିକାରୀ, କର୍ମଚାରୀ ଓ ଶ୍ରମିକମାନେ କାର୍ଯ୍ୟାଳୟକୁ ସୁବିଧାରେ ଯିବା ଆସିବା କରିପାରିବେ। ପ୍ରଭାଗୀୟ ଶ୍ରମ ସଂସ୍ଥାପକ ଶ୍ରୀ ମହାନ୍ତିଙ୍କୁ ଏସମ୍ପର୍କରେ ପଚାରିବାରୁ ସେ କହିଲେ ଯେ ଏ ନେଇ ବିଭାଗୀୟ ଅଧିକାରୀଙ୍କ ସହ ଆଲୋଚନା ହୋଇଛି। ଖୁବଶୀଘ୍ର ଏହାର ପ୍ରତିକାର କରାଯିବ ବୋଲି ଆଶ୍ୱାସନା ମିଳିଛି।