ଋଣ ଛାଡ଼ ସହ ମାଗଣାରେ ସାର ବିହନ ଯୋଗାଇବାକୁ ଦାବୀ
ପଟ୍ଟାମୁଣ୍ଡାଇ ତା ୨୩.୭-ଚଳିତବର୍ଷ ବ୍ରାହ୍ମଣୀ, ବୈତରଣୀ ଓ କାଣୀ ନଦୀରେ ପ୍ରଳୟଙ୍କରୀ ବନ୍ୟା ଆସିବା ଫଳରେ ପଟ୍ଟାମୁଣ୍ଡାଇ ଅଞ୍ଚଳ ରେ କ୍ଷୟକ୍ଷତି ସାଙ୍ଗକୁ ବ୍ୟାପକ ଫସଲହାନୀ ଘଟିଛି । ବନ୍ୟା ଯୋଗୁଁ ରାସ୍ତାଘାଟ କ୍ଷତିଗସ୍ତ ହୋଇଥିବା ବେଳେ ସ୍କୁଲ କଲେଜରେ ପାଣି ପଶି ବହୁତ କିଛି ନଷ୍ଟ କରିଛି । ପ୍ରାୟ ଏକ ସପ୍ତାହରୁ ଅଧିକ ସମୟ ଚାଷଜମି ଗୁଡିକ ବନ୍ୟା ପାଣିରେ ବୁଡି ରହିବା ଫଳରେ ଧାନ ଓ ବିଭିନ୍ନ ପନିପରିବା ଫସଲହାନୀ ଘଟିଛି । ଚଳିତ ବର୍ଷ ଧାନତଳି ପ୍ରସ୍ତୁତି ସମୟରେ ପ୍ରାୟ ୧ମାସରୁ ଉର୍ଦ୍ଧ ସମୟ ଧରି ଲଗାଣ ବର୍ଷା ଲାଗି ରହିବା ଫଳରେ ଚାଷୀ ୩ ଥର ଚଢ଼ା ଦରରେ ଧାନ ବିହନ କିଣି ତଳି ପକାଇଥିଲେ । ବିଭିନ୍ନ ସୂତ୍ରରୁ ଧାରକରଜ କରି ଚାଷୀ ମାନେ ଧାନ ଚାଷ କରିଥିଲେ । ବାରମ୍ବାର ଲଗାଣବର୍ଷା ଯୋଗୁଁ ଧାନ ଓ ପନିପରିବା ଫସଲ ବିଶେଷ ଭାବେ କ୍ଷତିଗସ୍ତ ହୋଇଥିବାବେଳେ ଯାହାକିଛି ବଞ୍ଚିଥିଲା ବର୍ଷା ପରେ ବନ୍ୟା ପରିସ୍ଥିତି ଧାନ ଓ ପନିପରିବା ଫସଲ ସମୂଳେ ନଷ୍ଟ ହୋଇଛି । ଚାଷ ପାଇଁ କରଜରେ ବୁଡି ରହିଥିବା ଚାଷୀମାନେ ବ୍ୟାପକ ଫସଲହାନୀ ଦେଖି ମାନସିକ ଭାରଶ୍ୟାମ ହରାଇ ବସିଛନ୍ତି । ଚାଷୀଙ୍କୁ ସାହା ହେବାକୁ ସତେ ଯେମିତି କେହିନାହାନ୍ତି । ବନ୍ୟା ଯୋଗୁଁ ଏକ ସପ୍ତାହ ଧରି ରାସ୍ତାଘାଟ ବୁଡି ରହିବା ଫଳରେ କ୍ଷତିଗସ୍ତ ହୋଇଛି । ବନ୍ୟା ଜଳରେ ବୁଡି ରହି ପନିପରିବା ଫସଲ ନଷ୍ଟ ହେବା ଫଳରେ ପରିବା ଦର ଆକାଶ ଛୁଆଁ ହୋଇଛି ।ବ୍ରାହ୍ମଣୀ, ବୈତରଣୀ ଓ କାଣୀ ନଦୀ ବନ୍ୟା ରେ ପଟ୍ଟାମୁଣ୍ଡାଇ ବ୍ଲକର ୧୪ ପଂଚାୟତ ଓ ପୌରାଞ୍ଚଳର ୧୧ଟି ୱାର୍ଡ କ୍ଷତିଗସ୍ତ ହୋଇଛି । ବନ୍ୟା କମିବା ପରେ ମଧ୍ୟ ପଟ୍ଟାମୁଣ୍ଡାଇ ବ୍ଲକର ସିଂହଗାଁ ସିଂହଗାଁ,ଅଳପୁଆ ତରଡ଼ିପାଳ,ପେଣ୍ଠପାଳ, ଅଣ୍ଢରା, ଅମୃତମଣୋହି,ବଲୁରିଆ,ନୀଳକଣ୍ଠପୁର, ବାଛରା, ବାଲିପାଟଣା, ଶ୍ରୀରାମପୁର, ଡାମରପୁର, ବଳଭଦ୍ରପୁର,ଶାସନ ଆଦି ପଂଚାୟତର ଚାଷଜମି ପାଣିରେ ବୁଡି ରହିଛି । ବନ୍ୟା ବିପନ୍ନ ପଟ୍ଟାମୁଣ୍ଡାଇ ଧୋୟାଞ୍ଚଳର ହଜାର ହଜାର ଏକର ଚାଷ ଜମି ବନ୍ୟାଜଳରେ ବୁଡି ରହିଥିବାରୁ ପନିପରିବା ସମେତ ବିଭିନ୍ନ ଫସଲହାନୀ ଘଟିଛି । ପଟ୍ଟାମୁଣ୍ଡାଇ ପୌରାଞ୍ଚଳର ବାଲିପଡ଼ା, ତଳବାଲିପଡ଼ା, ବଳଦେବନଗର, ସିଦ୍ଧପାଟଣା, କଷଣଅଣ୍ଟା, ନୂଆଗାଁ, କାକୁଡିପଲ୍ଲୀ, ତନୁପୁର, ନନ୍ଦିନୀନଗର, ଷଣ୍ଢପଲ୍ଲୀ, ଅଳଭା ଆଦି ବିଭିନ୍ନ ଅଂଚଳର ଶହ ଶହ ଏକର ଚାଷଜମି ମଧ୍ୟ ବୁଡି ରହିଛି । ବନ୍ୟା ପାଣିରେ ବୁଡି ରହି ପନିପରିବା ସମେତ ବିଭିନ୍ନ ଫସଲହାନୀ ଘଟିଛି । ସରକାର ଓ ପ୍ରଶାସନ କେବଳ ଗୋଖାଦ୍ୟ ବଣ୍ଟନ କରି ନିଜ ଦାୟିତ୍ୱ ସାରି ଦେଇଛନ୍ତି । ରାଜ୍ୟ ସରକାର ବନ୍ୟାବିପନ୍ନ ଲୋକମାନଙ୍କୁ ସମସ୍ତ ସରକାରୀ ସହାୟତା ସହ କ୍ଷତିଗସ୍ତ ଚାଷୀ ମାନଙ୍କ ସମବାୟ ଋଣ ଛାଡ଼ ସହିତ ମାଗଣା ସାର ଓ ବିହନ ଯୋଗାଇ ଦେବା ପାଇଁ ପଟ୍ଟାମୁଣ୍ଡାଇ ବ୍ଲକ ଅଧକ୍ଷ ପ୍ରଦ୍ୟୁମ୍ନ ସାମନ୍ତରାୟ, ପୌର ଅଧକ୍ଷ ହେମନ୍ତ ସାହୁ, ଯୁବନେତା ଉତ୍ତମ ଖୁଣ୍ଟିଆ, ସଂଗ୍ରାମ ସ୍ୱାଇଁ, ଶଶିକାନ୍ତ ପଣ୍ଡା ଓ ପ୍ରେମାନନ୍ଦ ସେଠୀ ଦାବୀ କରିଛନ୍ତି ।