ଭିନ୍ନକ୍ଷମ ଶିଶୁଙ୍କ ପ୍ରୋସ୍ଥେଟିକ୍ ମାପ ଶିବିର ଅନୁଷ୍ଠିତ

କେନ୍ଦ୍ରାପଡ଼ା,୧ା୬: କେନ୍ଦ୍ରାପଡ଼ା ଜିଲ୍ଲାରେ ଦୀର୍ଘ ବର୍ଷ ଧରି ବୌଦ୍ଧିକ ଭିନ୍ନକ୍ଷମ ଶିଶୁଙ୍କୁ ଥେରାପି ସେବା ପ୍ରଦାନ କରି ଆସୁଥିବା ପୁନର୍ବାସ ଅନୁଷ୍ଠାନ ଏବଂ ବାଞ୍ଛାନିଧି ଦାସ ଓ ଶ୍ରୀମତୀ ଦେବୀ ଚାରିଟେବୁଲ ଟ୍ରଷ୍ଟ ଆନୁକୂଲ୍ୟରେ ଏକ ପ୍ରୋସ୍ଥେଟିକ୍ ମାପ ଶିବିର ଅନୁଷ୍ଠିତ ହୋଇଯାଇଛି। ସ୍ଥାନୀୟ ମାଧପୁରସ୍ଥିତ ଥେରାପି କେନ୍ଦ୍ରରେ ଆୟୋଜିତ ହୋଇଥିବା ଏହି ଶିବିରରେ ସମୁଦାୟ ୧୦ଜଣ ମସ୍ତିଷ୍କ ପକ୍ଷାଘାତ ସ୍ୱତନ୍ତ୍ର ଶିଶୁଙ୍କ ଗୋଡ଼ ଓ ହାତ ନିମନ୍ତେ ପ୍ରୋସ୍ଥେଟିକ୍ ସହାୟକ ଉପକରଣର ମାପ ନିର୍ଦ୍ଧାରଣ କରାଯାଇଥିଲା। ବରିଷ୍ଠ ଥେରାପିଷ୍ଟ ଗିରିଜା ଶଙ୍କର ଖୁଣ୍ଟିଆ ଓ ରଶ୍ମିବାଳା ବେହେରା ଏବଂ ଟେକେନିକାଲ୍ ସହାୟକ ଶ୍ୟାମସୁନ୍ଦର ଷଡ଼ଙ୍ଗୀ ଏହି ସ୍ୱତନ୍ତ୍ର ଶିଶୁଙ୍କ ମାପ ନିର୍ଣ୍ଣୟ କରିଥିଲେ। ଏହି ଅବସରରେ କେନ୍ଦ୍ରାପଡ଼ା ଜିଲ୍ଲାର ପ୍ରାକ୍ତନ ସାମାଜିକ ସୁରକ୍ଷା ଅଧିକାରୀ ପ୍ରଭାସ ଚନ୍ଦ୍ର ଦାସ ଅତିଥି ରୂପେ ଯୋଗ ଦେଇଥିବାବେଳେ ଅନୁଷ୍ଠାନର ମୁଖ୍ୟ ଉପଦେଷ୍ଟା ବିରଜା ରାଉତରାୟ ଓ ସହ ସମ୍ପାଦକ ବଂଶୀଧର ମହାନ୍ତି ଉପସ୍ଥିତ ରହି ସ୍ୱତନ୍ତ୍ର ଶିଶୁଙ୍କ ଅଭିଭାବକ ଓ ଭୁବନେଶ୍ୱରରୁ ଆସିଥିବା ପ୍ରୋସ୍ଥେଟିକ୍ ଟିମ୍ ସହ ଭାବ ବିନିମୟ କରିଥିଲେ। ଏଠାରେ ପ୍ରକାଶଯୋଗ୍ୟ ଯେ ବାଞ୍ଛାନିଧି ଦାସ ଓ ଶ୍ରୀମତୀ ଦେବୀ ଚାରିଟେବୁଲ ଟ୍ରଷ୍ଟର ମୁଖ୍ୟ ଉପଦେଷ୍ଟା ତଥା ଆମେରିକାସ୍ଥିତ ଆଲାସ୍କା ବିଶ୍ୱବିଦ୍ୟାଳୟର ପ୍ରଫେସର ଡ଼. ଦେବେନ୍ଦ୍ର କୁମାର ଦାସ ସ୍ୱତନ୍ତ୍ର ଶିଶୁମାନଙ୍କ ଏହି ପ୍ରୋସ୍ଥେଟିକ୍ ଉପକରଣ ସହାୟକ ନିମନ୍ତେ ସହଯୋଗ ପ୍ରଦାନ କରିଛନ୍ତି । ଏହି ଶିବିରକୁ ପୁନର୍ବାସର ଫିଜିଓଥେରାପିଷ୍ଟ ରଚିତା ଜେନା, ଅନୁଷ୍ଠାନର ସଭ୍ୟ ମହମ୍ମଦ ଜାହିଦ୍ ଖାନ୍‌, ରଞ୍ଜନ ସ୍ୱାଇଁ, ଗାୟତ୍ରୀ ପୃଷ୍ଠି, ଦୀପକ ସାହୁ ଓ ଟ୍ରଷ୍ଟର ପ୍ରତିନିଧି ଭୁବନମୋହନ ଜେନା ପ୍ରମୁଖ ପରିଚାଳନାରେ ସହଯୋଗ କରିଥିଲେ। ଚଳିତ ମାସ ମଧ୍ୟରେ ମାପ ନିର୍ଦ୍ଧାରିତ ହୋଇଥିବା ଶିଶୁମାନଙ୍କୁ ପ୍ରୋସ୍ଥେଟିକ୍ ଉପକରଣମାନ ପ୍ରଦାନ କରାଯିବ ବୋଲି ପୁନର୍ବାସର ଉପ ସଭାପତି ଜ୍ୟୋତିରଞ୍ଜନ ନାୟକ ପ୍ରକାଶ କରିଛନ୍ତି।