ପଟ୍ଟାମୁଣ୍ଡାଇ, ୨୪/୧୨ -କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇ ବ୍ଲକ ଖଡ଼ିଅଂଟା ପ୍ରାଥମିକ ବିଦ୍ୟାଳୟ ପରିସରରେ ଥିବା ବାତ୍ୟା ଆଶ୍ରୟସ୍ଥଳୀ ଅସୁରକ୍ଷିତ ଜରାଜୀର୍ଣ୍ଣ ହୋଇପଡିଛି । ଏହି ବିପଦପୂର୍ଣ୍ଣ କୋଠା ଛାତରୁ ପ୍ଲାଷ୍ଟର ଖସୁ ଥିବାରୁ ଶତାଧିକ ଛାତ୍ରୀଛାତ୍ର ଅସୁରକ୍ଷିତ ଅବସ୍ଥାରେ ସ୍କୁଲ ଜିନ ଆସିବା କରୁଛନ୍ତି । ଭବିଷ୍ୟତରେ ପିଲାଙ୍କ ପାଇଁ କାଳ ସାଜିପାରେ ବୋଲି ଅଭିଭାବକମାନଙ୍କ ଚିନ୍ତା ବଢିଛି । ସୁରକ୍ଷା ପାଇଁ ହୋଇଥିବା ଆଶ୍ରୟସ୍ଥଳ ଏବେ ଅସୁରକ୍ଷିତ ଅବସ୍ଥାରେ ବିପଦକୁ ଆମନ୍ତ୍ରଣ କରୁଛି । ଏପରି ଅବସ୍ଥାରେ ଅନେକ ଅଭିଭାବକମାନେ ସେଠାରେ ପିଲାମାନଙ୍କୁ ପଢିବାକୁ ଛାଡୁ ନାହାନ୍ତି। ବାରମ୍ବାର ଅଭିଯୋଗ ପରେ ଜିଲା ପ୍ରଶାସନର ଦୃଷ୍ଟି ଦେଉନଥିବା ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ତେଜିବାରେ ଲାଗିଛି ।
ଗ୍ରାମର ସୁଭେନ୍ଦୁ ମହାନ୍ତି, କାହ୍ନୁଚରଣ ସାମଲ, ସରୋଜ ରାଉତ, ସୁଶାନ୍ତ ସାମଲ, ଅଜୟ ନାୟକ, ଅଶୋକ ମହାନ୍ତି ପ୍ରମୁଖ କୁହନ୍ତି ୧୯୯୯ ମହାବାତ୍ୟା ପରେ ଖଡ଼ିଅଂଟା ଗାଁ ସ୍କୁଲ ପରିସରରେ ଏକ ବାତ୍ୟା ଆଶ୍ରୟସ୍ଥଳ ନିର୍ମାଣ ହୋଇଥିଲା । ସେତେବେଳେ ଖଡିଅଂଟା ପ୍ରାଥମିକ ବିଦ୍ୟାଳୟ ଘର ଅଭାବରୁ କୁନିକୁନି ପିଲାମାନେ ବାତ୍ୟା ଆଶ୍ରୟସ୍ଥଳୀରେ ବସି ପାଠ ପଢୁଥିଲେ। ପ୍ରାୟ ୧୦ ବର୍ଷ ହେବ ଆବଶ୍ୟକ ମରାମତି ଅଭାବରୁ ବାତ୍ୟା ଆଶ୍ରୟସ୍ଥଳୀଟି ଧିରେ ଧିରେ ଅସୁରକ୍ଷିତ ହୋଇ ପଡିଛି । ଏହି ୨ ମହଲା ବିଶିଷ୍ଟବାତ୍ୟା ଆଶ୍ରୟସ୍ଥଳ ଗୃହଟିରୁ ସିମେଂଟ ଖଣ୍ଡ ଖସୁଥିବା ବେଳେ ଝରକା କବାଟ ଭାଙ୍ଗି ଯାଇଛି । ବିପତି ସମୟରେ ଏଠାରେ ଲୋକମାନେ ଆଶ୍ରୟ ନେବା ଆଉ ସମ୍ଭବପର ନୁହେଁ । ଏହି କୋଠାର ତଳ ମହଲା ଅର୍ଥାତ୍ ଗୋରୁଙ୍କ ପାଇଁ ଉଦ୍ଦିଷ୍ଟ ଗୁହାଳଟିରେ କେହି ବସାଉଠା କରିବାକୁ ସାହସ କରୁନାହାନ୍ତି । ଏହାର ପାଖରେ ଖଡ଼ିଅଂଟା ପ୍ରାଥମିକ ବିଦ୍ୟାଳୟ ରହିଛି । ଉକ୍ତ ବିଦ୍ୟାଳୟରେ ପ୍ରଥମରୁ ପଂଚମ ଶ୍ରେଣୀର ପିଲା ପାଠ ପଢ଼ୁଛନ୍ତି । ପିଲାମାନେ ସେଠାରେ ଖେଳକୁଦ ମଧ୍ୟ କରୁଛନ୍ତି । କିନ୍ତୁ ଏହି କୋଠାଟି ବିପଦସଙ୍କୁଳ ବୋଲି କୌଣସି ସୂଚନା ଫଳକ ଲଗାଯାଇନାହିଁ । ତେବେ କେତେବେଳେ ଯେ ଦୁର୍ଘଟଣା ନ ଘଟିବ ତାହା କହିହେବ ନାହିଁ । ତେଣୁ ଉକ୍ତ କୋଠାଟିକୁ ମରାମତି କିମ୍ବା ତୁରନ୍ତ ଭାଙ୍ଗି ଦେବା ପାଇଁ ଗ୍ରାମବାସୀ ମାନେ ଦାବି କରିଛନ୍ତି । ଏ ସମ୍ପର୍କରେ ବିଡିଓ ଶିତଳ ଅଗରୱାଲା ଅଭିଯୋଗ ପାଇଲି କ୍ଷେତ୍ର ପରିଦର୍ଶନ ପରେ ପଦେକ୍ଷେପ ନିଆଯିବ ।