ନୂଆଦିଲ୍ଲୀ ୭/୫- ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ୱରୂପ ଭାରତ ମଙ୍ଗଳବାର ରାତିରେ ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀରରେ ଥିବା ୯ଟି ଆତଙ୍କବାଦୀ ଅଡ୍ଡା ଉପରେ ମିସାଇଲ ଆକ୍ରମଣ କରିଛି। ଏହି ଅଭିଯାନକୁ ‘ଅପରେଶନ ସିନ୍ଦୁର’ ନାମ ଦିଆଯାଇଛି। ଭାରତୀୟ ବାୟୁସେନା, ସ୍ଥଳସେନା ଓ ନୌସେନାର ମିଳିତ ଉଦ୍ୟମରେ ଏହି ଆକ୍ରମଣ କରାଯାଇଥିବା ଭାରତୀୟ ପ୍ରତିରକ୍ଷା ମନ୍ତ୍ରଣାଳୟ ସୂଚନା ଦେଇଛି।
ଏପ୍ରିଲ ୨୨ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ନାଗରିକଙ୍କ ମୃତ୍ୟୁ ଘଟିଥିଲା। ଏହାର ପ୍ରତିଶୋଧ ନେବା ପାଇଁ ଭାରତ ଏହି ଅଭିଯାନ ଆରମ୍ଭ କରିଥିଲା। ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ଏହି ଆକ୍ରମଣ କେବଳ ଆତଙ୍କବାଦୀ ଅଡ୍ଡାଗୁଡ଼ିକୁ ଟାର୍ଗେଟ କରିଥିଲା ଏବଂ ପାକିସ୍ତାନର ସୈନ୍ୟ ସମ୍ପର୍କିତ କୌଣସି ସ୍ଥାନକୁ ଆକ୍ରମଣ କରାଯାଇ ନ ଥିଲା। ଏହା ଏକ “ସୀମିତ ଓ ନିୟନ୍ତ୍ରିତ” କାର୍ଯ୍ୟାନୁଷ୍ଠାନ ବୋଲି ଭାରତ ଦାବି କରିଛି।ଅନ୍ୟପକ୍ଷରେ, ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଏହି ଆକ୍ରମଣକୁ “ଯୁଦ୍ଧର କାର୍ଯ୍ୟ” ବୋଲି ଅଭିହିତ କରି କହିଛନ୍ତି ଯେ, ପାକିସ୍ତାନକୁ ଏହାର “ଉଚିତ ଜବାବ” ଦେବାର ଅଧିକାର ରହିଛି। ସେ ପାକିସ୍ତାନ ସେନାକୁ ମୁକ୍ତ ଅଧିକାର ଦେଇଥିବା ଏବଂ ଜାତୀୟ ସୁରକ୍ଷା ପରିଷଦ (ଏନଏସସି)ର ଏକ ଜରୁରୀ ବୈଠକ ଡାକିଥିବା ସୂଚନା ମିଳିଛି। ସରିଫ ଆଜି ପାକିସ୍ତାନ ସଂସଦରେ ଏହି ଘଟଣା ସମ୍ପର୍କରେ ସମ୍ବୋଧନ କରିବେ ବୋଲି ଜଣାପଡ଼ିଛି।ଭାରତର ଏହି ଆକ୍ରମଣରେ ପାକିସ୍ତାନର ବାହାଓାଲପୁର, ମୁରିଦକେ ଓ ମୁଜଫ୍ଫରାବାଦ ଅଞ୍ଚଳରେ ଥିବା ଜୈଶ-ଏ-ମହମ୍ମଦ ଓ ଲସ୍କର-ଏ-ତୈବା ଭଳି ଆତଙ୍କବାଦୀ ସଂଗଠନର ଅଡ୍ଡାଗୁଡ଼ିକୁ ଟାର୍ଗେଟ କରାଯାଇଥିଲା। ରିପୋର୍ଟ ଅନୁଯାୟୀ, ଏହି ଆକ୍ରମଣରେ ୮୦-୯୦ ଜଣ ଆତଙ୍କବାଦୀ ନିହତ ହୋଇଥିବା ଜଣାପଡ଼ିଛି।ଏହି ଘଟଣା ପରେ ପାକିସ୍ତାନ ସେନା ଜମ୍ମୁ ଓ କାଶ୍ମୀରର ନିୟନ୍ତ୍ରଣ ରେଖା (ଏଲଓସି) ନିକଟରେ ଭାରୀ ଗୁଳିବର୍ଷା କରିଥିବା ଅଭିଯୋଗ ହୋଇଛି। ଏହା ଫଳରେ କୁପୱାଡ଼ା ଜିଲ୍ଲାର କର୍ଣ୍ଣାହ ଅଞ୍ଚଳରେ ୮ ଜଣ ନାଗରିକଙ୍କ ମୃତ୍ୟୁ ଘଟିଥିବା ଓ ୨୫ ଜଣ ଆହତ ହୋଇଥିବା ରିପୋର୍ଟ ମିଳିଛି। ଭାରତ ଏହି ଅଭିଯାନ ସମ୍ପର୍କରେ ଆମେରିକା, ରୁଷିଆ, ବ୍ରିଟେନ ଓ ସାଉଦି ଆରବ ଭଳି ଦେଶମାନଙ୍କୁ ସୂଚନା ଦେଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅଭିଯାନକୁ ନିକଟରୁ ନିରୀକ୍ଷଣ କରୁଥିବା ଜଣାପଡ଼ିଛି। ଏହି ଘଟଣା ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରିଛି। ବିଶ୍ୱ ନେତାମାନେ ଉଭୟ ଦେଶକୁ ଶାନ୍ତି ବଜାୟ ରଖିବାକୁ ଆହୱାନ କରିଛନ୍ତି।