ଲଗାଣ ବର୍ଷା ବିତ୍ପାତ , ସହର ଜଳାର୍ଣ୍ଣବ, ବିଗିଡିବ ଦୁର୍ଗାପୂଜା ମାହୋଲ

ପଟ୍ଟାମୁଣ୍ଡାଇ ୨୭/୯- କେନ୍ଦ୍ରାପଡା ଜିଲାର ଭାଇଚାରା ସହର ପଟ୍ଟାମୁଣ୍ଡାଇରେ ଉଭୟ ହିନ୍ଦୁ ଓ ମୁସଲମାନମାନେ ଶାରଦୀୟ ଦୂର୍ଗା ପୂଜା ଉତ୍ସବକୁ ମିଳିତ ଭାବେ ବିପୁଳ ଆନନ୍ଦ ଉଲ୍ଲାସର ସହିତ ପାଳନ କରିଥାନ୍ତି । ମାତ୍ର ଲଘୁଚାପଜନିତ ଲଗାଣ ବର୍ଷା ସବୁ କିଛି ପାଣିରେ ପକାଇ ଦେଇଛି । ଶାରଦୀୟ ଦୂର୍ଗା ପୂଜା ଉତ୍ସବ ପାଇଁ ଘରେ ଘରେ ବନ୍ଧୁ ବାନ୍ଧବ ଓ କୁଣିଆଙ୍କ ଭିଡ଼ ଲାଗି ଥିବାବେଳେ ବର୍ଷକରେ ଥରେ ବିଭିନ୍ନ ବ୍ୟବସାୟ କରି ଲାଭବାନ ହେବା ପାଇଁ ଆଶା ରଖିଥିବା ବ୍ୟବସାୟୀମାନେ ଲଗାଣ ବର୍ଷା ଦେଖି ଆଶଙ୍କାରେ ପଡିବା ସହିତ ଚିନ୍ତିତ ହୋଇପଡିଛନ୍ତି । ଅନ୍ୟପକ୍ଷରେ ପୌର ପ୍ରଶାସନ ପକ୍ଷରୁ ଉଠାଦୋକାନୀ ଉଛେଦ ହୋଇଥିବାରୁ ଭଙ୍ଗାରୁଜା କେବିନ ଟିଣ ପଡି ମାହୋଲକୁ ଆହୁରି ଖାଁ ଖାାଁ କରିଛି । ଲଗାଣବର୍ଷା ଯୋଗୁଁ ଫିକା ପଡି ବାକୁ ଯାଉଥିବା ପଟ୍ଟାମୁଣ୍ଡାଇ ଅଂଚଳର ଶାରଦୀୟ ପୂଜା ଉତ୍ସବକୁ ବିପୁଳ ଆନନ୍ଦ ଉଲ୍ଲାସର ପାଳନ କରିବା ପାଇଁ ଅରିକ୍ଷିତକୁ ଦଇବ ସାହା ନ୍ୟାୟରେ ଭଗବାନ ଭରସା ବୋଲି ସାଧାରଣରେ ଚର୍ଚ୍ଚା ଚାଲିଛି ।
ଚଳିତବର୍ଷ ଶାରଦୀୟ ଦୁର୍ଗା ପୂଜା ଉତ୍ସବରେ ପଟ୍ଟାମୁଣ୍ଡାଇ ସହରରେ ୨୭ଟି ମେଢ଼ ପୂଜା ଉତ୍ସବର ଶୋଭାବର୍ଦ୍ଧନ କରିବାଜୁ ଯାଉଛନ୍ତିା ପୂଜା ମାହୋଲକୁ ଅଧିକ ମନୋରମ ଓ ଆକର୍ଷଣୀୟ କରିବା ପାଇଁ ମିନା ବଜାର ଠାରୁ ଆରମ୍ଭ କରି ଅନେକ ମନୋରଞ୍ଜନକାରୀ ସଂସ୍ଥା ତାଙ୍କର ସରଞ୍ଜାମ ଧରି ପଟ୍ଟାମୁଣ୍ଡାଇରେ ହାଜର ହୋଇଛନ୍ତି । ସବୁ ଆଶା ଓ ସ୍ୱପ୍ନକୁ ପାଣି ଫୋଟକା ଭଳି ମେଳାଇ ଦେଇଛି ଲଗାଣ ବର୍ଷା ବିତ୍ପାତ । ଲଗାଣ ବର୍ଷା ଯୋଗୁଁ ପଟ୍ଟାମୁଣ୍ଡାଇ ସହର ଜଳାର୍ଣ୍ଣବ ହୋଇ ପଡିବା ସହିତ ସହରର ବିଭିନ୍ନ ସ୍ଥାନରେ ବର୍ଷା ପାଣି ସୁଅ ଛୁଟୁଛି । ସତେ ଯେମିତି ଶାରଦୀୟ ଦୁର୍ଗା ପୂଜା ଉତ୍ସବ ଉପରେ ପ୍ରକୃତି ଦାଉ ସାଜିଛି । ପଟ୍ଟାମୁଣ୍ଡାଇ ସହରର ଅନେକ ରାସ୍ତା ଘାଟରେ ବର୍ଷା ପାଣି ଭରି ରହିଛି । ଏଥି ସହିତ ହସ୍ପିଟାଲ ଛକ ଠାରୁ ପଟ୍ଟାମୁଣ୍ଡାଇ କଲେଜ ରୋଡ଼ ଖାଦିମ ସୋ ରୁମ ସମ୍ମୁଖ ରାସ୍ତା ଓ ସରକାରୀ ବାଳିକା ହାଇସ୍କୁଲ ରାସ୍ତାରେ ବର୍ଷା ପାଣି ଲହଡି ଭାଙ୍ଗୁଛି । ପଟ୍ଟାମୁଣ୍ଡାଇ ଯଜ୍ଞ ପଡିଆରେ ମିନା ବଜାର ପଡିବା ପାଇଁ ପ୍ରସ୍ତୁତ ହେଉଥିବାବେଳେ ଯଜ୍ଞ ପଡିଆ ବର୍ଷା ପାଣିରେ ବୁଡି ରହିଥିବାରୁ ମିନା ବଜାର ପଡିବା ନେଇ ଆଶଙ୍କା ସୃଷ୍ଟି ହୋଇଛି । ପଟ୍ଟାମୁଣ୍ଡାଇ ସହରରୁ ଜଳ ନିଷ୍କାସନ ପାଇଁ ଆବଶ୍ୟକ ଡ୍ରେନ ନଥିବାରୁ ଏଭଳି ସ୍ଥିତି ସୃଷ୍ଟି ହୋଇଛି ।