ପଟ୍ଟାମୁଣ୍ଡାଇ ତା ୧୮/୯–ପଟ୍ଟାମୁଣ୍ଡାଇଳୁ ରାଜସ୍ୱ ସବଡିଭିଜନ ମାନ୍ୟତା ପ୍ରଦାନ ପ୍ରସଙ୍ଗକୁ ନେଇ ରାଜନଗର ବିଧାୟକ ଧ୍ରୁବ ସାହୁ ଗୁରୁବାର ବିଧାନସଭାରେ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି । ବିଧାୟକ ସାହୁଙ୍କ ପ୍ରଶ୍ନର ଉତରରେ ରାଜ୍ୟରେ ସବ-ଡିଭିଜନ ପୁନଗଠନ ପ୍ରକ୍ରିୟା ଅଦ୍ୟାବଧି କରାଯାଇନାହିଁ, ଓଡ଼ିଶା ରାଜସ୍ୱ ପ୍ରଶାସନ (ୟୁନିଟ୍) ଆଇନ, ୧୯୬୩, ବର୍ତମାନ ଭାରତୀୟ ନ୍ୟାୟ ସୁରକ୍ଷା ସଂହିତା ୭(୩) ଆଇନ ଅନୁଯାୟୀ ସରକାର ପଦକ୍ଷେପ ନେବେ ବୋଲି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୁଜାରୀ ଉତ୍ତର ରଖିଛନ୍ତି ।
ରାଜନଗର ବିଧାୟକ ଧ୍ରୁବ ସାହୁ ୨୦୧୯ ମସିହା ଠାରୁ ପଟ୍ଟାମୁଣ୍ଡାଇ ସବଡିଭିଜନ ପାଇଁ ବିଭିନ୍ନ ସମୟରେ ରାଜ୍ୟ ବିଧାନସଭାରେ ଏକାଧିକ ବାର ପ୍ରଶ୍ନ ଉତ୍ଥାପନ କରି ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି । ସମ୍ପ୍ରତି ରାଜ୍ୟର ନୂତନ ବିଜେପି ସରକାର ପଂଚାୟତ, ବ୍ଲକ ଓ ଜିଲ୍ଲା ପୁନଃର୍ଗଠନ କରିବା ପାଇଁ ଯୋଜନା କରିବା ଓ ଏ ଦିଗରେ ପଦକ୍ଷେପ ନେବା ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ସବୁ ମହଲରେ ତତ୍ପରତା ପ୍ରକାଶ ପାଇଛି । ରାଜ୍ୟ ସରକାର ସବଡିଭିଜନ ପୁନଃର୍ଗଠନ ପାଇଁ ପଦକ୍ଷେପ ନେବାର ଯୋଜନା ଥିବାରୁ ଆଜି ରାଜ୍ୟ ବିଧାନସଭାରେ ରାଜନଗର ବିଧାୟକ ଧ୍ରୁବ ସାହୁ ପୁନରାୟ ସବଡିଭିଜନ ପ୍ରସଙ୍ଗ ଉତ୍ଥାପନ କରି ସରକାରଙ୍କ ଠାରୁ ଜବାବ ମାଗିଛନ୍ତି । ବିଧାୟକ ଧ୍ରୁବ ସାହୁଙ୍କ ପ୍ରଶ୍ନର ଉତ୍ତରରେ ରାଜ୍ୟ ରାଜସ୍ୱମନ୍ତ୍ରୀ ସୁରେଶ ପୂଜାରୀ ସମ୍ପ୍ରତି ରାଜ୍ୟରେ ସବଡିଭିଜନ ପୁନଃର୍ଗଠନ ପାଇଁ ସରକାରଙ୍କ କୌଣସି ପ୍ରସ୍ତାବ ନାହଁ । ଆଗାମୀ ଦିନରେ ବ୍ଲକ ଓ ଜିଲ୍ଲା ପୁନଃର୍ଗଠନ ହେଲେ ସାରା ସରକାର ଆଇନ ଅନୁଯାୟୀ ପଦକ୍ଷେପ ନେବେ ବୋଲି ବିଧାନସଭାରେ ପ୍ରକାଶ କରିଛନ୍ତି ।