ଗୋବରାଙ୍ଗ ସେଠୀ ହତ୍ୟା ଘଟଣା ଏକ ଯୋଜନାବଦ୍ଧ ହତ୍ୟା ଅଭିଯୋଗ

କେନ୍ଦ୍ରାପଡା ୫/୬: ଗୋବରାଙ୍ଗ ସେଠୀଙ୍କ ମୃତ୍ୟୁ ସାଧାରଣ ଘଟଣା ନୁହେଁ, ବରଂ ଏକ ସୁପରିକଳ୍ପିତ ହତ୍ୟା ବୋଲି ପରିବାର ଏବଂ ସ୍ଥାନୀୟ ଲୋକ ଅଭିଯୋଗ କରୁଛନ୍ତି। ଅଭିଯୋଗ ଅନୁଯାୟୀ, ସରପଞ୍ଚଙ୍କ ସ୍ୱାମୀ ମଣି ସାହୁଙ୍କ ସମେତ ପ୍ରାୟ ୧୫ରୁ ୨୦ ଜଣ ଲୋକ ଏହି ଘଟଣାରେ ସମ୍ପୃକ୍ତ ଥିଲେ। ଘଟଣାରୁ ପ୍ରକାଶ ଯେ ଗୋବରାଙ୍ଗଙ୍କୁ ଗାଁର ଗାଧୁଆ ତୁଠ ନିକଟରୁ ଧରି ରାସ୍ତା ଉପରେ ଅଟକାଇ ଲୁହା ରଡ଼, ଠେଙ୍ଗା ଓ ଅନ୍ୟାନ୍ୟ ମାରଣାସ୍ତ୍ରରେ ନିର୍ମମ ଭାବେ ମାଡ଼ ମରାଯାଇଥିଲା। ମାଡ଼ ସମୟରେ ସେ ପାଣି ମାଗିଥିଲେ ମଧ୍ୟ ତାଙ୍କୁ ପାଣି ଦିଆଯାଇନଥିଲା। ବରଂ ତାଙ୍କ ବାପା, ଭାଇ ଓ ଅନ୍ୟ ଗ୍ରାମବାସୀମାନେ ସହାୟତା କରିବାକୁ ଯିବାବେଳେ ସେମାନଙ୍କୁ ମଧ୍ୟ ଆକ୍ରମଣ କରାଯାଇଥିବା ଅଭିଯୋଗ ରହିଛି। ଘଟଣାର ଭିଡିଓ ଗ୍ରାମର ଅନେକ ଲୋକ ମୋବାଇଲରେ ଧାରଣ କରିଥିବା କଥା ମଧ୍ୟ କୁହାଯାଉଛି। ସେଥିପାଇଁ ସମସ୍ତ ସମ୍ପୃକ୍ତ ବ୍ୟକ୍ତିଙ୍କ ମୋବାଇଲ ଫୋନର ଫରେନସିକ ଯାଞ୍ଚ କରାଯିବାକୁ ଦାବି ହେଉଛି। ଅଭିଯୋଗ ଅନୁସାରେ, ଗୋବରାଙ୍ଗଙ୍କୁ ଚିକିତ୍ସା ପାଇଁ ପରିବାର ଲୋକଙ୍କ ହାତକୁ ଦିଆଯାଇନଥିଲା। ପରେ ତାଙ୍କର ମୃତ୍ୟୁ ହୋଇଯାଇଥିବା ଜାଣି ସାରିବା ପରେ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଘରଠାରୁ ପ୍ରାୟ ୧୫ କିଲୋମିଟର ଦୂରରେ ଥିବା ଏକ ଜନଶୂନ୍ୟ ସ୍ଥାନରେ ମୃତଦେହକୁ ଫିଙ୍ଗି ଦିଆଯାଇଥିଲା। ମୃତଦେହର ପରିଚୟ ନଷ୍ଟ କରିବା ପାଇଁ ପୋଷାକ ଖୋଲାଯାଇଥିବା ଏବଂ କୌଣସି ରାସାୟନିକ ପଦାର୍ଥ କିମ୍ବା ଅନ୍ୟ ବସ୍ତୁ ବ୍ୟବହାର କରାଯାଇଥିବା ସନ୍ଦେହ ମଧ୍ୟ ଉଠିଛି। ଏହି ଘଟଣାରେ ସ୍ଥାନୀୟ ପୋଲିସର ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠିଛି। ଅଭିଯୋଗକାରୀମାନଙ୍କ ମତରେ, ପୋଲିସ ଘଟଣା ସମ୍ପର୍କରେ ଅବଗତ ଥିଲେ ମଧ୍ୟ ସଠିକ୍ ପଦକ୍ଷେପ ନେଇନଥିଲେ ଏବଂ ପ୍ରମାଣ ନଷ୍ଟ ହେବାକୁ ସୁଯୋଗ ଦେଇଥିଲେ। ତେଣୁ ଏହି ଘଟଣାର ନିରପେକ୍ଷ ଏବଂ ଉଚ୍ଚସ୍ତରୀୟ ତଦନ୍ତ, ଯଥା କ୍ରାଇମବ୍ରାଞ୍ଚ ଦ୍ୱାରା ତଦନ୍ତ କରାଯିବା ସହ ସମସ୍ତ ଦୋଷୀଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ନିଆଯିବାକୁ ଦାବି କରାଯାଉଛି।
ପରିବାର ପକ୍ଷରୁ ଆହୁରି ଅଭିଯୋଗ କରାଯାଇଛି ଯେ, ଘଟଣାର ସଠିକ୍ ତଦନ୍ତ ହୋଇନଥିଲା ଏବଂ ପ୍ରମାଣ ସଂରକ୍ଷଣରେ ଅବହେଳା କରାଯାଇଥିଲା। ଏହି କାରଣରୁ ସ୍ଥାନୀୟ ପୋଲିସ ଉପରେ ସେମାନଙ୍କ ବିଶ୍ୱାସ ରହିନାହିଁ ବୋଲି ସେମାନେ କହୁଛନ୍ତି।