ପଟ୍ଟାମୁଣ୍ଡାଇ ୧୧/୮ – ପଟ୍ଟାମୁଣ୍ଡାଇ ଗ୍ରାମାଂଚଳ ଥାନା ଅନ୍ତର୍ଗତ ଡାମରପୁର ପଂଚାୟତ ରାଘବପୁର ଗ୍ରାମରେ ଜନୈକ ଶଶୁର ନିଜର ବିଧବା ବୋହୁଙ୍କ ଗାଲ କାମୁଡି ଦେଇଥିବା ଗତ ମାସ ୩୧ ତାରିଖରେ ଅଭିଯୋଗ ହୋଇଛି । ଏ ସମ୍ପର୍କରେ ବୋହୁ ଗ୍ରାମାଂଚଳ ଥାନାରେ ଅଭିଯୋଗ କରିଥିବା ବେଳେ ଶାଶୁ ପାଲଟା ଏତଲା ଦେଇଛନ୍ତି । ଏଥିନେଇ ପୋଲିସ ଉଭୟଙ୍କ ଅଭିଯୋଗ ଉପରେ ମାମଲା ନଂ-୨୭୩/୨୦୨୫ ବୋହୁର ଏତଲା ଉପରେ ୨୭୪/୨୦୨୫ ରୁଜୁକରି ତଦନ୍ତ ଚଲାଇଛି ।
ଅଭିଯୋଗ ଅନୁଯାଇ ପଟ୍ଟାମୁଣ୍ଡାଇ ଗ୍ରାମାଂଚଳ ଥାନା ଅନ୍ତର୍ଗତ ଡାମରପୁର ପଂଚାୟତ ରାଘବପୁର ଗ୍ରାମର ଜଣେ ମହିଳାଙ୍କୁ ତାଙ୍କ ଶ୍ବଶୁର ଶାଶୁ ଓ ଦ଼ିଅର ତାଙ୍କ ସ୍ୱାମୀଙ୍କ ମୃତ୍ୟୁ ପରେ ନାନା ପ୍ରକାର ଶାରୀରିକ ଓ ମାନସିକ ନିର୍ଯ୍ୟାତନା ଦେଇଆସୁଛନ୍ତି । ସଦା ବେଳେ ଅଶୀଳ ଭାଷାରେ ଗାଳି ଗୁଲଜ ସହ ମାଡ ମାରିଆସୁଛନ୍ତି । ଏପରିକି ଘରୁ ବାହାର କରିଦେବାକୁ ଧମକ ଦେଇଛନ୍ତି । ଯାହାଫଳରେ ନିର୍ଯ୍ୟାତନା ସହି ନପାରି ନିଜର ଛୋଟ ପିଲାମାନଙ୍କୁ ଧରି ବିଧବା ବୋହୁ ନିଜ ଶାଶୁ ଘର ସଂଲଗ୍ନ ଏକ ଛୋଟ ଘରେ ରହୁଆସୁଥିଲେ । ସେଠାରେ ବର୍ଷା ଦିନେ ପାଣି ଗଳିବାରୁ ଶଶୁର ବଳରାମଙ୍କୁ ଜଣାଇବାରୁ ସେ ଶାଶୁ ଓ ଦେଢ଼ଶୁର ଉତ୍ୟକ୍ତ ହୋଇ ବୋହୁଙ୍କୁ ଗାଳି ଗୁଲଜ ଓ ମାରଧର କରିଥିଲେ । ଶଶୁର ରାଗି ଯାଇ ବିଧବା ବୋହୁ ଙ୍କ ଗାଲ କାମୁଡି ଦେବାରୁ ଗାଲରୁ ରକ୍ତ ବାହାରିଥିବା ନେଇ ବୋହୁ ପଟ୍ଟାମୁଣ୍ଡାଇ ଗ୍ରାମାଂଚଳ ଥାନାରେ ଲିଖିତ ଅଭିଯୋଗ କରିଛନ୍ତି ।
ମାତ୍ର ଘଟଣା ଦିନ ପ୍ରଥମେ ଶାଶୁ ଥାନାରେ ପହଁଚି ବୋହୁ ମାଡମାରି ଶ୍ୱଶୁରକୁ ତଳେପକାଇ ଦେଇଥିବା ନେଇ ଅଭିଯୋଗ କରିଥିଲେ । ସେଥିରେ ବୋହୂ ମାଡିବସି ଶ୍ବଶୁରଙ୍କ ହାତକୁ କାମୁଡିବା ସହିତ ଛଡାଛଡି ବେଳେ ଶାଶୁ ହାତକୁ ମଧ୍ୟ କାମୁଡି ଦେଇଥିଲା । ଘଟଣା ସବୁ ଓ୍ବାର୍ଡ ମେମ୍ବରଙ୍କ ଉପସ୍ଥିତିରେ ଘଟିଥିଲା । ଗ୍ରାମାଂଚଳ ଥାନା ପୋଲିସ ଉଭୟ ପକ୍ଷଙ୍କ ଏତଲାକୁ ଗ୍ରହଣ କରି ତଦନ୍ତ କରୁଛି ।