ପଟ୍ଟାମୁଣ୍ଡାଇ ୩୦/୭ -ବ୍ରାହ୍ମଣୀ ନଦୀରେ ଦେଖା ଦେଇଥିବା ଦିତୀୟ ବନ୍ୟାର ୩/୪ ଦିନ ପରେ ମଧ୍ୟ ବନ୍ୟାଜଳ ବିପଦ ସଂକେତ ଉପରେ ରହିଛି । ଗୁରୁବାର ସନ୍ଧ୍ୟା ସୁଦ୍ଧା ଅଳଭା ଠାରେ ୧୭. ୧୦ ଉପରେ ବନ୍ୟାଜଳ ଗତିକରୁଛି । ସରକାରୀ ଭାବେ ବ୍ରିଟିଶ ଅମଳରୁ ୧୬ ଫୁଟ ବିପଦ ସଂଙ୍କେତ ଥିବା ବେଳେ ଏଯାବତ ନିର୍ଣ୍ଣୟ କରାଯାଇନାହିଁ । ହେଲେ ଏବେ ବନ୍ୟା ବିପନ୍ନଲୋକ ମାନଙ୍କ ଦୁର୍ଦଶା ବଢ଼ିବାରେ ଲାଗିଛି । ବିପନ୍ନ ଅଂଚଳରେ ଅତ୍ୟାବଶ୍ୟକ ସାମଗ୍ରୀର ଅଭାବ ଦେଖାଦେଇଛି । ରାସ୍ତାଘାଟ ବୁଡି ଯାଇଥିବାରୁ ଗମନା ଗମନ ବାଧାପ୍ରାପ୍ତ ହୋଇଛି । ବନ୍ୟା ଯୋଗୁଁ ଗରିବ ଖଟିଖିଆ ମୁଲିଆ ଶ୍ରେଣୀର ଲୋକମାନେ କାମକୁ ଯାଇ ନପାରି ଭୋକ ଉପାସରେ କାଳାତିପାତ କରୁଛନ୍ତି । ବିଦ୍ୟୁତ ଓ ଟେଲି ସେବା ପ୍ରଭାବିତ ହୋଇଛି । ଚାଷ ଜମି ବୁଡି ଯାଇଥିବାରୁ ଗାଇ ଗୋରୁ ଛେଳିମେଣ୍ଢାମାନେ ଚରିବାକୁ ଯାଇନପାରି ଡହଳବିକଳ ହେଉଛନ୍ତି ।
ପଟ୍ଟାମୁଣ୍ଡାଇ ଧୋୟାଂଚଳରେ ବାରମ୍ବାର ବନ୍ୟା ଆସିବା ଫଳରେ କ୍ଷୟକ୍ଷତି ଓ ଫସଲହାନ ଘଟି ଗରିବ ଖଟିଖିଆ ଓ ଚାଷୀମାନେ ଚିନ୍ତିତ ହୋଇପଡିଛନ୍ତି । ପଟ୍ଟାମୁଣ୍ଡାଇ ବ୍ଲକର ୧୪ ପଂଚାୟତ ଲୋକେ ଓ ପୌରାଂଚଳର ୧୧ଟି ୱାର୍ଡର ହଜାର ହଜାର ଏକର ଜମିରେ ଜଳ କମି ଆସୁଥିବା ବେଳେ ସୋମାବାର ପୂଣି ଜଳମଗ୍ନ ହୋଇପଡିଛି । ପ୍ରଥମ ବନ୍ୟାରୁ ସିଂହଗାଁ ପଂଚାୟତ ବାହ୍ୟଜଗତରୁ ବିଛିନ୍ନ ରହିଥିବା ବେଳେ ଅଳପୁଆ, ତରଡ଼ିପାଳ, ପେଣ୍ଠପାଳ, ଅଣ୍ଢରା, ଅମୃତମଣୋହି, ବଲୁରିଆ ପଂଚାୟତର ବିଭିନ୍ନ ଗ୍ରାମର ହଜାର ହଜାର ଏକର ଚାଷଜମି ଜଳମଗ୍ନ ହୋଇ ପଡିଛି । ଗୁରୁବାର ନୀଳକଣ୍ଠପୁର ଦୋଷମାଳି ଓ ଡାମରପୁର ଜେନାପାଟଣାରେ କୁମ୍ଭୀର ଦେଖି ଲୋକମାନେ ଭୟ ଭୀତ ହୋଇଥିବାବେଳେ ସମଗ୍ର ବନ୍ୟାଂଚଳରେ କୁମ୍ଭୀର ଭୟ ଲାଗି ରହିଛି । ବ୍ରାହ୍ମଣୀ ନଦୀରେ ବାରମ୍ବାର ବନ୍ୟା ଯୋଗୁଁ ପଟ୍ଟାମୁଣ୍ଡାଇ ବ୍ଲକ ଓ ପୌରାଂଚଳର ବିପନ୍ନ ଲୋକମାନେ ଦୁର୍ଦଶା ମଧ୍ୟରେ ରହିଥିବା ଅନୁଭବ କରି ବିପନ୍ନ ଲୋକମାନଙ୍କୁ ସମସ୍ତ ସହାୟତା ଯୋଗାଇ ଦେବା ପାଇଁ କେନ୍ଦ୍ରାପଡ଼ା ବିଧାୟକ ଗଣେଶ୍ୱର ବେହେରା ଓ ରାଜନଗର ବିଧାୟକ ଧ୍ରୁବ ସାହୁ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ନିକଟରେ ଦାବୀ କରିଛନ୍ତି । ବ୍ରାହ୍ମଣୀ ନଦୀରେ ଦେଖା ଦେଇଥିବା ୨ୟ ବନ୍ୟାରେ ପଟ୍ଟାମୁଣ୍ଡାଇ ବ୍ଲକର ସିଂହ ଗାଁ, ଶ୍ରୀରାମପୁର, ଡାମରପୁର, ବଳଭଦ୍ରପୁର ଓ ବାଛରା ପଂଚାୟତର ଅନେକ ଗାଁ ବାହ୍ୟଜଗତରୁ ବିଛିନ୍ନ ହୋଇରହିଛି ।
ପଟ୍ଟାମୁଣ୍ଡାଇ ବ୍ଲକ ଓ ପୌରାଂଚଳର ବିଭିନ୍ନ ଅଂଚଳରେ ଥିବା ଚାଷ ଜମିରେ ପ୍ରାୟ ୧୫/୨୦ ଦିନଧରି ବନ୍ୟାଜଳ ବୁଡି ରହି ଥିବାରୁ ଧାନ, ପନିପରିବା ଫସଲ ପଚି ସମୂଳେ ନଷ୍ଟ ହେବା ସହିତ ପୁତି ଗନ୍ଧମୟ ପରିସ୍ଥିତି ସୃଷ୍ଟି ହୋଇଛି । ବନ୍ୟାଂଚଳରେ ପରିବେଶ ଦୂଷିତ ଯୋଗୁଁ ବିଭିନ୍ନ ସଂକ୍ରାମକ ରୋଗ ଦେଖା ଦେଇଛି । ବିଶୁଦ୍ଧ ପିଇବା ପାଣି ସଂକଟ ଦେଖା ଦେଇଛି । ନୀଳକଣ୍ଠପୁର ପଂଚାୟତ ଡଗରାପାଳ ଠାରେ ଗତକାଲି ବନ୍ୟା ସ୍ରୋତରେ ଏକ ବଡ଼ ଘଳିଆ ସୃଷ୍ଟି ହୋଇଥିଲା । ପଟ୍ଟାମୁଣ୍ଡାଇ ଜଳ ସମ୍ପଦ ବିଭାଗ ସହକାରୀ ଯନ୍ତ୍ରୀ ଇଂ ମନୋରଞ୍ଜନ ସାହୁ ବିଭାଗୀୟ କର୍ମ ଚାରୀଙ୍କ ସହିତ ତୁରନ୍ତ ଗଳିଆ ବାଲି ବସ୍ତା ଦ୍ୱାରା ବନ୍ଦ କରିବା ପରେ ଘାଇ ସୃଷ୍ଟି ଆଶଙ୍କା ଦୂର ହୋଇଛି । ପଟ୍ଟାମୁଣ୍ଡାଇ ବ୍ଲକର ୧୪ ପଂଚାୟତ ଓ ପୌରାଂଚଳର ୧୧ଟି ୱାର୍ଡର ହଜାର ହଜାର ଏକର ଜମି ଜଳମଗ୍ନ ହୋଇରହିଛି ।