ପଟ୍ଟାମୁଣ୍ଡାଇ ୨୧/୭ -କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇ ଗୋବରୀ ସମ୍ପ୍ରସାରିତ କେନାଲ ସଫେଇ ନାମରେ କେନାଲକୁୁ ହଳକରି ଲକ୍ଷାଧିକ ଟଙ୍କା ଆତ୍ମସାତ୍ କରିବାକୁ ଉଦ୍ୟମ ଚାଲିଥିବା ଅଭିଯୋଗ ହୋଇଛି । କେନାଲରେ ଶୁଖିଲା ଥିବାବେଳେ ସଫେଇ କରିବାର ନିୟମକୁ ଅଣଦେଖା କରି ଆଣ୍ଠୁଏ ଲେଖାଁଏ ବର୍ଷାପାଣିରେ ସଫେଇ କରାଯାଉଛି । ପଙ୍କମାଟି, ଦଳ ଆବର୍ଜନା ଉଦ୍ଧାର ନାମରେ କେବଳ କେନାଲ ଶଯ୍ୟାରେ ଟ୍ରାକ୍ଟର ଚଲାଇ ବିଭାଗୀୟ କର୍ତ୍ତୃପକ୍ଷ ଓ ଠିକାଦାର ଦାୟିତ୍ୱ ସାରିଦେଇଛନ୍ତି । ମେସିନ୍ କିମ୍ବା ଶ୍ରମିକଙ୍କ ଦ୍ୱାରା ଆବର୍ଜନା ସମ୍ପୂର୍ଣ୍ଣ ସଫା ନକରି କେବଳ ଟ୍ରାକ୍ଟର ଓ ହଳ ଚଲାଇ କାମ ହୋଇଥିବା ଦେଖାଯାଇଛି। ଏହାଦ୍ୱାରା କେନାଲ ଭିତରେ ଥିବା ଦଳ, ଗଛ ଓ ଆବର୍ଜନା ବାହାରକୁ ନଆସି ମାଟି ସହ ମିଶି ପଚିବାରେ ଲାଗିଛି । ଏହାଯୋଗୁଁ ଆଖପାଖ ଅଂଚଳରେ ଏପରି ପଚାଗନ୍ଧ ହେଉଛି ଯେ ସାଧାରଣ ଲୋକଙ୍କର ନାକ ଫାଟିପଡ଼ୁଛି ଏବଂ ସ୍ଥାନୀୟ ଅଞ୍ଚଳରେ ରହିବା ଦୁର୍ଭର ହୋଇପଡ଼ିଛି ସାଧାରଣରେ ଅସନ୍ତୋଷ ପ୍ରକାଶ ପାଇଛି ।
ପଟ୍ଟାମୁଣ୍ଡାଇ ଉତିକଣ ଅଂଚଳର ଚାଷ ଜମିକୁ ଜଳସେଚନ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଗୋବରୀ କେନାଲ ସଫେଇ କାର୍ଯ୍ୟରେ ଜାରିରହିଛି ।ଏଥିନେଇ ଠିକାଦାର କେନାଲ ଶଯ୍ୟାରେ ଟ୍ରାକ୍ଟର ଚଲାଇ ହଳ କରାଉଥିବା ବେଳେ କେନାଲର ପାର୍ଶ୍ୱଗୁଡ଼ିକୁ ଜେସିବି ମେସିନ୍ ସାହାଯ୍ୟରେ ଦାୟିତ୍ୱହୀନ ଭାବେ ତାଡ଼ି ଦେଉଛି। ତଡ଼ାଯାଇଥିବା ମାଟି ଓ ପଙ୍କ, ଦଳ, ଘାସ ଓ ଅବର୍ଜନା କେନାଲ ବାହାରକୁ ନିଆନଯାଇ ଶଯ୍ୟା ଉପରେ ହିଁ ଗଦା କରି ରଖାଯାଇଛି । ଫଳରେ ଚଳିତ ଖରିଫ ଋତୁ ଚାଷ ବେଳେ ଜଳ ପ୍ରବାହ ସୁଗମ ହେବା ପରିବର୍ତେ ଆହୁରି ବାଧାପ୍ରାପ୍ତ ହେବ ସମ୍ଭାବନା ସୃଷ୍ଟି ହୋଇଛି ବୋଲି ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି। ଅନ୍ୟପକ୍ଷରେ ଜେସିବି ମେସିନ୍ ସାହାଯ୍ୟରେ କେନାଲର ଉଭୟ ପାଶ୍ୱର୍ ତାଡ଼ି ଦେଉଥିବାରୁ କେନାଲର ପ୍ରାକୃତିକ ବନ୍ଧ ଦୁର୍ବଳ ହୋଇପଡ଼ିବା ସହ ଆଗାମୀ ବର୍ଷା ଦିନରେ ବ୍ୟାପକ ଅତଡ଼ା ଖସିବା ଆଶଙ୍କା ଦେଖାଦେଇଛି। ଯାହାଦ୍ୱାରା ସୋତ ଲେବୁଲ କେନାଲ ପୋତି ହୋଇ ଜଳପରିଚାଲନା ତୃଟି ଦେଖାଯିବା ବୋଲି ଚାଷୀମାନେ ମତ ପ୍ରକାଶ କରିଛନ୍ତି । ଏହି ସମ୍ପୂର୍ଣ୍ଣ କାର୍ଯ୍ୟରେ ଅନଭିଜ୍ଞ ଯନ୍ତ୍ରୀ ଓ ବିଭାଗୀୟ ଅଧିକାରୀଙ୍କ ଦାୟିତ୍ୱହୀନତା ସ୍ପଷ୍ଟ ବାରି ହୋଇପଡ଼ୁଛି ବୋଲି ସେମାନେ ପ୍ରଶ୍ନ ଉଠାଇଛନ୍ତି । କାର୍ଯ୍ୟର ତଦାରଖ ଅଭାବରୁ ଠିକାଦାରମାନେ ମନମୁଖୀ ଭାବେ ନିମ୍ନମାନର କାମ କରି ସରକାରୀ ତହବିଲ୍ରୁ ଟଙ୍କା ହଡ଼ପ କରିବା ମସୁଧାକୁ ନେଇ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି।
କେନାଲର ନିର୍ଦ୍ଧାରିତ ନିୟମାବଳୀକୁ ସମ୍ପୂର୍ଣ୍ଣ ଆଖିବୁଜି ଦିଆଯାଇଛି । ଚଳିତ ଖରିଫ ଚାଷ ପୂର୍ବରୁ ଯଦି ଏହି ସମସ୍ୟାର ସୁଧାର ନଆସେ, ତେବେ ଶେଷ ମୁଣ୍ଡରେ ଥିବା ଜମିଗୁଡ଼ିକୁ ପାଣି ପହଁଚିିବା ଅସମ୍ଭବ ହୋଇପଡ଼ିବ। ଏହାଦ୍ୱାରା ଶହ ଶହ ଏକର ଚାଷଜମି ପ୍ରଭାବିତ ହେବାର ଆଶଙ୍କା ରହିଛି ବୋଲି ସ୍ଥାନୀୟ କୃଷକ ନରେଶ ଜେନା, ଅଭୟ ବଳ, ଅମୁଲ୍ୟ ନାୟକ, କାଳନ୍ଦି ମଲିକ, ସୁରେନ୍ଦ୍ର ପରିଡା, ଅଶୋକ ଜେନା ପ୍ରମୁଖ ଏହି ଦୁର୍ନୀତିର ଉଚ୍ଚସ୍ତରୀୟ ତଦନ୍ତ କରିବା ସହ ଅଭିଯୁକ୍ତ ଯନ୍ତ୍ରୀ ଓ ଠିକାଦାରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି।