ଦାଦାବଟି ମାଗି ବିଫଳ ହେବାରୁ ବୃଦ୍ଧଙ୍କୁ ବୁଲେଟ୍ ଚେନ୍ ରେ ପିଟିଲେ ଦୁର୍ବୃତ୍ତ

କେନ୍ଦ୍ରାପଡା ୭/୩ – ଦାଦାବଟି ମାଗି ବିଫଳ ହେବାରୁ ବୃଦ୍ଧଙ୍କୁ ବୁଲେଟ୍ ଚେନ୍ ରେ ପିଟିଲେ ଦୁର୍ବୃତ୍ତ । ଏହି ମାଡମରା ଘଟଣା ସିସିଟିଭି କ୍ୟାମେରାରେ କଏଦ ହୋଇଛି । ଘଟଣା ଘଟିଛି କେନ୍ଦ୍ରାପଡା ଛାଞ୍ଚୁଣିଆ ଗାଁର ବ୍ୟବସାୟୀ ଅନନ୍ତ ଚରଣ ପାତ୍ର । ଆକ୍ରମଣର ଶିକାର ହୋଇଥିବା ଅନନ୍ତ ଏବେ ଗୁରୁତର ଅବସ୍ଥାରେ ଚିକିତ୍ସାଧିନ ଅଛନ୍ତି । ଅନ୍ୟପକ୍ଷରେ ସୁରକ୍ଷା ନମିଳିଲେ ଗାଁ ଛାଡି ପଳାଇବେ ବୋଲି କହିଛନ୍ତି ବ୍ୟବସାୟୀଙ୍କ ପରିବାର ।
ଅଭିଯୋଗ ଅନୁଯାୟୀ ଅନନ୍ତ ପାତ୍ର ଏବଂ ତାଙ୍କ ପୁଅ ଠାକୁରହାଟ ବଜାରରେ ବ୍ୟବସାୟ କରି ପରିବାର ପ୍ରତିପୋଷଣ କରନ୍ତି । ସ୍ଥାନୀୟ କିଛି ଅସାମାଜିକ ଯୁବକ ତାଙ୍କୁ ବିଭିନ୍ନ ସମୟରେ ଦାଦାବଟି ମାଗି ଆସୁଥିଲେ । ଅନନ୍ତ ପାତ୍ର ଏହାର ପ୍ରତିବାଦ କରିବାରୁ ସେହି ଅସାମାଜିକ ଯୁବକମାନେ ଦିନ ଦିପହରେ ବୁଲେଟ୍ ଚେନ୍ ରେ ପ୍ରଥମେ ତାଙ୍କ ଘର କବାଟ ଓ ଦୋକାନ ସଟର୍ କୁ ବାଡ଼େଇ ଥିଲେ । ଅନନ୍ତ ଘରୁ ବାହାରି ଆସି ଏହାର ପ୍ରତିବାଦ କରିବାରୁ ସମ୍ପୃକ୍ତ ଯୁବକ ଅନନ୍ତଙ୍କ କାନମୁଣ୍ଡରେ ବୁଲେଟ୍ ଚେନ୍ ରେ ପିଟି ଦେଇଥିଲା । ଫଳରେ ଘଟଣାସ୍ଥଳରେ ସେ ପଡିଯାଇଥିଲେ । ଗୁରୁତର ଅବସ୍ଥାରେ ତାଙ୍କୁ ତୁରନ୍ତ ଚିକିତ୍ସା ପାଇଁ ଜିଲା ମୁଖ୍ୟଚିକିତ୍ସାଳୟରେ ଭର୍ତି କରାଯାଇଥିଲା । ଦାଦାବଟି ନେଇ ଅନନ୍ତ ପାତ୍ରଙ୍କ ପରିବାର ଉପରକୁ ଏଭଳି ଆକ୍ରମଣ ପ୍ରଥମ ନୁହଁ । ଏହା ଗତ ଡିସେମ୍ବର ୭ ତାରିଖ ରାତିରେ ମଧ୍ୟ ଏହାଠାରୁ ଭୟଙ୍କର ଆକ୍ରମଣ କରିଥିଲେ ଏହି ଗୋଷ୍ଠୀ । ଅନନ୍ତଙ୍କ ପୁଅ ଭାବଗ୍ରାହୀକୁ ବୋତଲରେ ମାଡମାରି ରକ୍ତାକ୍ତ କରି ଦେଇଥିଲେ । ଏହାର ଭିଡ଼ିଓ ମଧ୍ୟ ଭାଇରାଲ ହୋଇଥିଲା । ଦୁର୍ବୃତ୍ତଙ୍କୁ ଡରି ଅନନ୍ତ ଏବ୍‌ଂ ତାଙ୍କ ପରିବାର ଘଟଣାର ଆପୋଷ ସମାଧାନ କରିବାକୁ ବାଧ୍ୟ ହୋଇଥିଲେ । ଏବେ ପୁଣିଥରେ ଆରମ୍ଭ ହୋଇଛି ସେହି ଅସାମାଜିକ ମାନଙ୍କ ଜୁଲମ୍ । ଦୁର୍ବୃତ୍ତମାନେ ବାରମ୍ବାର ଅନନ୍ତଙ୍କ ପରିବାର ର ମହିଳାଙ୍କୁ ଟାର୍ଗେଟ କରୁଥିବା ନେଇ ଅଭିଯୋଗ ମଧ୍ୟ ହୋଇଛି । ଏଥିରେ ଅତିଷ୍ଠ ହୋଇ ଅନନ୍ତଙ୍କ ପରିବାର ଗାଁ ଛାଡି ପଳାଇବା ପାଇଁ କହିଲେଣି । ଅନ୍ୟପକ୍ଷରେ ଆକ୍ରମଣ କରି ଘଟଣାସ୍ଥଳରୁ ଫେରାର୍ ହୋଇଯାଇଥିଲା ଆକ୍ରମଣକାରୀ । ଏ ନେଇ ଥାନାରେ ଅଭିଯୋଗ ହୋବା ପରେ ପୋଲିସ ଏ ପର୍ଯ୍ୟନ୍ତ କାହାରିକୁ ଧରି ପାରିନାହିଁ । ମିଳିଥିବା ସୂଚନା ଅନୁଯାୟୀ ଅଭିଯୁକ୍ତ ମାନଙ୍କର ନାନା ଅପରାଧିକ ରେକର୍ଡ ରହିଛି । ଏହାର ତୁରନ୍ତ ପଦକ୍ଷେପ ନେବାକୁ ସ୍ଥାନୀୟ ବାସିନ୍ଦାମାନେ କହିଛନ୍ତି ।