କେନ୍ଦ୍ରାପଡ଼ା, ୧ା୧୧: କେନ୍ଦ୍ରାପଡ଼ା ଐତିହାସିକ ଲକ୍ଷ୍ମୀପୂଜାର ଶତବାର୍ଷିକୀ ଉତ୍ସବ ଅବସରରେ ଆୟୋଜିତ ହେଉଥିବା ଲକ୍ଷ୍ମୀପୂଜା ଭଷାଣି ଶୋଭାଯାତ୍ରା ଓ ମେଲଣକୁ ଶାନ୍ତିଶୃଙ୍ଖଳା, ସୁରକ୍ଷିତ ଏବଂ ସୁବ୍ୟବସ୍ଥିତ ଭାବେ ସମ୍ପନ୍ନ କରିବା ପାଇଁ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ବ୍ୟାପକ ଏବଂ ବହୁସ୍ତରୀୟ ସୁରକ୍ଷା ବଳୟର ବ୍ୟବସ୍ଥା ଗ୍ରହଣ କରାଯାଇଛି। ଏହି ଅବସରରେ କେନ୍ଦ୍ରାପଡ଼ା ସହର ଓ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ୩୦ରୁ ଅଧିକ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି। ଆଇନଶୃଙ୍ଖଳା ରକ୍ଷା, ଜନସମାଗମ ନିୟନ୍ତ୍ରଣ ଏବଂ ଶ୍ରଦ୍ଧାଳୁ ଓ ଦର୍ଶକମାନଙ୍କ ସୁରକ୍ଷା ସୁନିଶ୍ଚିତ କରିବା ଲାଗି ବରିଷ୍ଠ ପୋଲିସ ଅଧିକାରୀଙ୍କ ସମେତ ଏଏସ୍ପି, ଡିଏସ୍ପି, ଇନ୍ସପେକ୍ଟର ଓ ଅନ୍ୟାନ୍ୟ ପୋଲିସ କର୍ମଚାରୀଙ୍କୁ ସ୍ୱତନ୍ତ୍ର ଦାୟିତ୍ୱ ଅର୍ପଣ କରାଯାଇଛି। କେନ୍ଦ୍ରାଞ୍ଚଳ ଆଇଜିପି ଡ. ସତ୍ୟଜିତ ନାୟକ, ଆଇପିଏସ୍, ଏବଂ କେନ୍ଦ୍ରାପଡା ଏସପି ସିଦ୍ଧାର୍ଥ କାଟାରିଆ, ନିଜେ କ୍ଷେତ୍ରସ୍ତରରେ ଉପସ୍ଥିତ ରହି ସୁରକ୍ଷା ବ୍ୟବସ୍ଥାର ତଦାରଖ କରୁଛନ୍ତି। ଉଭୟ ବରିଷ୍ଠ ଅଧିକାରୀ ବିଭିନ୍ନ ସମ୍ବେଦନଶୀଳ ଓ ଜନଗହଳିପୂର୍ଣ୍ଣ ସ୍ଥାନ ପରିଦର୍ଶନ କରି ପୋଲିସ ମୁତୟନ, ଭିଡ଼ ନିୟନ୍ତ୍ରଣ ଓ ସୁରକ୍ଷା ବ୍ୟବସ୍ଥାର ସ୍ଥିତି ସମୀକ୍ଷା କରିବା ସହ କ୍ଷେତ୍ରରେ ନିୟୋଜିତ ପୋଲିସ କର୍ମଚାରୀଙ୍କୁ ଆବଶ୍ୟକୀୟ ନିର୍ଦ୍ଦେଶ ଦେଉଛନ୍ତି। ବିଭିନ୍ନ ସମ୍ବେଦନଶୀଳ ଓ ଜନଗହଳିପୂର୍ଣ୍ଣ ସ୍ଥାନରେ ସ୍ୱତନ୍ତ୍ର ପୋଲିସ ଟିମ୍ ନିୟୋଜିତ ହୋଇଥିବାବେଳେ ମୋବାଇଲ୍ ପାଟ୍ରୋଲିଂ ୟୁନିଟ୍, ଷ୍ଟ୍ରାଇକିଂ ଫୋର୍ସ ଓ ସାଦା ପୋଷାକଧାରୀ ପୋଲିସ କର୍ମଚାରୀଙ୍କ ଦ୍ୱାରା ନିରନ୍ତର ନଜର ରଖାଯାଉଛି। ଶ୍ରଦ୍ଧାଳୁମାନଙ୍କ ସୁବିଧାଜନକ ଯାତାୟାତ ପାଇଁ ଟ୍ରାଫିକ୍ ନିୟନ୍ତ୍ରଣ, ନିର୍ଦ୍ଧାରିତ ପାର୍କିଂ ସ୍ଥଳ ଏବଂ ଜନସାଧାରଣଙ୍କ ଚଳପ୍ରଚଳ ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ନିମନ୍ତେ ସିସିଟିଭି ନିରୀକ୍ଷଣ ଓ ଅନ୍ୟାନ୍ୟ ବୈଷୟିକ ବ୍ୟବସ୍ଥାର ଉପଯୋଗ କରାଯାଉଛି। ଯେକୌଣସି ଜରୁରୀ ପରିସ୍ଥିତିର ତୁରନ୍ତ ମୁକାବିଲା ପାଇଁ ପୋଲିସ କର୍ମଚାରୀମାନଙ୍କୁ ସଜାଗ ରହିବା ସହ ପୂଜା କମିଟି, ସ୍ୱେଚ୍ଛାସେବୀ ଏବଂ ଅନ୍ୟାନ୍ୟ ବିଭାଗ ସହ ସମନ୍ୱୟ ରକ୍ଷା କରିବାକୁ ନିର୍ଦ୍ଦେଶ ଦିଆଯାଇଛି। ଜିଲ୍ଲା ପୋଲିସ ପ୍ରଶାସନ ପକ୍ଷରୁ ସମସ୍ତ ଶ୍ରଦ୍ଧାଳୁ, ପୂଜା କମିଟି ଓ ଜନସାଧାରଣଙ୍କୁ ଶାନ୍ତି ଓ ଶୃଙ୍ଖଳା ବଜାୟ ରଖିବା, ପୋଲିସକୁ ସହଯୋଗ କରିବା, ଟ୍ରାଫିକ୍ ନିୟମ ଓ ପାର୍କିଂ ନିର୍ଦ୍ଦେଶାବଳୀ ପାଳନ କରିବାକୁ ଅନୁରୋଧ କରାଯାଇଛି। ଗୁଜବରେ ବିଶ୍ୱାସ ନକରିବା ସହ କୌଣସି ସନ୍ଦେହଜନକ କାର୍ଯ୍ୟକଳାପ ଦେଖିଲେ ତୁରନ୍ତ ନିକଟସ୍ଥ ପୋଲିସ କର୍ମଚାରୀଙ୍କୁ ଅବଗତ କରାଇବାକୁ ମଧ୍ୟ ଅନୁରୋଧ କରାଯାଇଛି। ସକ୍ରିୟ ପୋଲିସିଂ, ବ୍ୟାପକ ସୁରକ୍ଷା ବ୍ୟବସ୍ଥା ଏବଂ ବରିଷ୍ଠ ଅଧିକାରୀଙ୍କ ପ୍ରତ୍ୟକ୍ଷ ତଦାରଖ ମାଧ୍ୟମରେ କେନ୍ଦ୍ରାପଡ଼ା ପୋଲିସ ଶତବାର୍ଷିକୀ ଲକ୍ଷ୍ମୀପୂଜା ଭସାଣି ଓ ମେଲଣକୁ ଶାନ୍ତିପୂର୍ଣ୍ଣ, ସୁରକ୍ଷିତ ଓ ସଫଳତାର ସହ ସମ୍ପନ୍ନ କରିବାକୁ ପ୍ରତିବଦ୍ଧ ରହିଥିବା ଜିଲ୍ଲା ପୋଲିସ ପକ୍ଷରୁ କୁହାଯାଇଛି।
କେନ୍ଦ୍ରାପଡା ଗଜଲକ୍ଷ୍ମୀ ପୂଜା
ମେଲଣ ପଡିଆକୁ ବାହାରିଲେ ବିଭିନ୍ନ ମେଢ
କେନ୍ଦ୍ରାପଡ଼ା,୧ା୧୧:କେନ୍ଦ୍ରାପଡା ଗଜଲକ୍ଷ୍ମୀ ପୂଜାର ଶତବାର୍ଷିକ ଐତିହ୍ୟ ପାଳନ ଅବସରରେ ଆଜି ସହରର ବିଭିନ୍ନ ସ୍ଥାନରେ ହୋଇଥିବା ପୂଜା ମେଢ ଗୁଡିକ ଗୋଟିଏ ପରେ ଗୋଟିଏ ପୁରୁଣା ବସଷ୍ଟାଣ୍ଡସ୍ଥିତ ମେଲଣ ପଡିଆକୁ ଶୋଭାଯାତ୍ରାରେ ବାହାରିଛନ୍ତି। ପ୍ରଥମେ ନୂଆ ବସଷ୍ଟାଣ୍ଡ ସ୍ଥିତ ଥାନପତି ପୂଜା କମିଟି ଲକ୍ଷ୍ମୀ ମେଢ ଆସ୍ଥାନରୁ ବାହାରି ଶୋଭାଯାତ୍ରାରେ ମେଲଣ ପଡିଆ ଅଭିମୁଖେ ବାହାରିବା ପରେ କାକଟମଙ୍ଗଳା ପୂଜା କମିଟି ମେଢ ବାହାରିଥିଲା। ଆଜି ସକାଳ ୧୦ଟା ସୁଦ୍ଧା ସହରର ବିଭିନ୍ନ ସ୍ଥାନରେ ହୋଇଥିବା ମେଢ ଗୁଡିକ ନିଜ ନିଜ ଆସ୍ଥାନରୁ ବାହାରକୁ ବାହାରି ଆସିଥିଲେ। ଏହାପରେ ପ୍ରାୟ ୧୨ଟା ବେଳକୁ ମେଢ ଗୁଡିକ ଶୋଭାଯାତ୍ରାରେ ବାହାରିବା ଆରମ୍ଭ କରିଦେଇଥିଲେ। ତିନିମୁହାଣି ଓ ଗୁଲନଗର ପୂଜା ମେଢ ଠାରୁ ଆରମ୍ଭ ପୁରୁଣା ବସଷ୍ଟାଣ୍ଡ ପର୍ଯ୍ୟନ୍ତ ଥିବା ମେଢ ଗୁଡିକ ଶୋଭାଯାତ୍ରାରେ ବାହାରିଥିବା ବେଳେ କେଶପୁର, ସାନ୍ତସାହି ଠାରୁ ଆରମ୍ଭ କରି ମଢିଆଳ ପର୍ଯ୍ୟନ୍ତ ଥିବା ପୂଜା ମେଢ ଗୁଡିକ ମଧ୍ୟ ଶୋଭାଯାତ୍ରାରେ ମେଲଣ ପଡିଆ ଅଭିମୁଖେ ବାହାରିଥିଲେ। ସହରରେ ଶାନ୍ତିଶୃଙ୍ଖଳା ରକ୍ଷା ଓ ଜନସାଧାରଣଙ୍କ ସୁରକ୍ଷା ନିମନ୍ତେ ବ୍ୟାପକ ପୋଲିସ ସୁରକ୍ଷା ବ୍ୟବସ୍ଥା କରାଯାଇଛି। ପୋଲିସ ଅଧିକାରୀଙ୍କ ସମେତ ପୋଲିସ ଫୋର୍ସ ଓ ସାଦା ପୋଷାକ ଧାରୀ ପୋଲିସ ମଧ୍ୟ ମୃତୟନ ହୋଇଛନ୍ତି। ଆଜି ରାତି ଗୋଟାଏ ସୁଦ୍ଧା ମେଢ ଗୁଡିକ ପୁରୁଣା ବସଷ୍ଟାଣ୍ଡସ୍ଥିତ ମେଲଣ ପଡିଆରେ ପହଞ୍ଚିବାର ସମ୍ଭାବନା ରହିଛି। ଏହି ଶୋଭାଯାତ୍ରାରେ ପୂର୍ବବର୍ଷ ଭଳି ସମସ୍ତ ଆଇନକାନୁନକୁ ଅଣଦେଖା କରାଯାଇ ଡିଜେ ବଜାଇ ଶୋଭାଯାତ୍ରା ବାହାରିଛି। ଏଥିପ୍ରତି ପୋଲିସ ବା ପ୍ରଶାସନ କାହାରି ଅଙ୍କୁଶ ରହୁନଥିବା ଦେଖିବାକୁ ମିଳିଛି।
